संगमनेर | महाराष्ट्र संवाद न्यूज
संगमनेर नगरपरिषद सार्वत्रिक निवडणूकीची मतमोजणी उद्या रविवारी, (२१ डिसेंबर) सहकार महर्षी भाऊसाहेब थोरात क्रीडा संकुल परिसरात पार पडणार आहे. मतमोजणी प्रक्रियेदरम्यान कायदा व सुव्यवस्था राखण्यासाठी आणि वाहतुकीची कोंडी टाळण्यासाठी प्रशासनाने क्रीडा संकुल परिसरातील वाहतूक व्यवस्थेत मोठे बदल केले असून अनेक रस्ते सर्वसामान्यांसाठी बंद ठेवण्याचा निर्णय घेतला आहे.मतमोजणीच्या दिवशी सुरक्षिततेच्या कारणास्तव खालील मार्गांवरून सर्व वाहनांना व नागरिकांना प्रवेश नाकारण्यात आला आहे-
ईदगाह मैदान ते नेहरू गार्डन: हा संपूर्ण रस्ता मतमोजणीच्या दिवशी बंद राहील.
शहर पोलीस स्टेशन ते संजय गांधी नगर: या दरम्यानचा रस्ता बॅरिकेडिंग करून पूर्णतः बंद असेल.
वकील कॉलनी व अभंग मळा: या भागातून क्रीडा संकुलाकडे येणारे अंतर्गत रस्तेही बंद राहतील.
बॅडमिंटन हॉल कोपरा व गेट नं. १: येथील मार्गांवर बॅरिकेड्स लावून प्रवेश थांबवण्यात येईल.उमेदवार, त्यांचे प्रतिनिधी आणि अधिकारी यांच्या वाहनांसाठी स्वतंत्र पार्किंग व्यवस्था करण्यात आली आहे-
उमेदवार व प्रतिनिधी: यांच्यासाठी पेटीट कॉलेज आणि सिद्धार्थ हायस्कूल येथे पार्किंगची सोय आहे.
सिद्धार्थ हायस्कूल पार्किंग मार्ग: या पार्किंगकडे जाण्यासाठी केवळ ‘शहर पोलीस स्टेशन ते संजय गांधी नगर ते सिद्धार्थ शाळा गेट’ याच मार्गाचा वापर करावा लागेल.
अधिकारी व कर्मचारी: कवी अनंत फंदी समोरील बेसमेंट, तहसील कार्यालय परिसर आणि त्याजवळील नियुक्त पार्किंगमध्ये त्यांची वाहने लावता येतील.प्रवेशासाठी कडक नियम
ओळखपत्र अनिवार्य: प्रत्येक व्यक्तीकडे निवडणूक निर्णय अधिकाऱ्यांनी दिलेले वैध ओळखपत्र असणे बंधनकारक आहे.
प्रतिबंधित वस्तू: मतमोजणी कक्षात मोबाईल फोन, स्वतःचे पेन, कागद किंवा इतर कोणत्याही वस्तू नेण्यास सक्त मनाई आहे.
साहित्य पुरवठा: मतमोजणीच्या नोंदीसाठी आवश्यक असणारे पेन आणि रायटिंग पॅड प्रशासनाकडून जागेवरच उपलब्ध करून दिले जाईल.
सुरक्षा तपासणी: कडक पोलीस बंदोबस्त तैनात असून सुरक्षा तपासणीनंतरच प्रवेश दिला जाईल.सार्वजनिक घोषणांची व्यवस्था
नागरिकांना मतमोजणीची फेरीनिहाय माहिती मिळावी यासाठी प्रशासनाने चार ठिकाणी सार्वजनिक उद्घोषणा यंत्रणा लावली आहे:
१. बॅडमिंटन हॉल बाहेरील परिसर.
२. ईदगाह मैदानाकडील परिसर.
३. क्रीडा संकुल गेट क्रमांक १.
४. संगमनेर शहर पोलीस स्टेशन समोर.प्रशासनाने सर्व संबंधित उमेदवार, प्रतिनिधी आणि नागरिकांना या नियमांचे पालन करण्याचे आवाहन निवडणूक निर्णय अधिकारी तथा प्रांताधिकारी अरुण उंडे, सहाय्यक निवडणूक निर्णय अधिकारी तथा तहसीलदार धीरज मांजरे, सहाय्यक निवडणूक निर्णय अधिकारी तथा मुख्याधिकारी दयानंद गोरे, पोलीस उपअधीक्षक डॉ. कुणाल सोनवणे व पोलीस निरीक्षक समीर बारवकर यांनी केले आहे.
