संगमनेर | महाराष्ट्र संवाद न्यूज
संगमनेर नगर परिषदेच्या निवडणूक प्रक्रियेचा महत्त्वाचा टप्पा असलेल्या मतमोजणीची तयारी पूर्ण झाली असून, रविवारी (दिनांक २१ डिसेंबर) ही प्रक्रिया पार पडणार असल्याची माहिती निवडणूक निर्णय अधिकारी अरुण उंडे यांनी दिली आहे. मतमोजणी सुव्यवस्थित पार पाडण्यासाठी प्रशासनाने १० टेबलांची व्यवस्था केली असून संपूर्ण मोजणी एकूण ८ फेऱ्यांमध्ये पूर्ण केली जाणार आहे.
निवडणूक निर्णय अधिकारी अरुण उंडे यांनी दिलेल्या माहितीनुसार, मतमोजणीला सकाळी दहा वाजता सहकार महर्षी भाऊसाहेब थोरात क्रीडा संकुलातील बॅडमिंटन हॉलमध्ये सुरुवात होणार असून मतमोजणीच्या फेऱ्यांचे नियोजन प्रभागांनुसार करण्यात आले आहे.
पहिल्या फेरीत प्रभाग १ व २ ची मोजणी होईल, तर दुसऱ्या फेरीत प्रभाग ३, ४ व ५ आणि तिसऱ्या फेरीत प्रभाग ६, ७ व ८ च्या मतांची मोजणी केली जाईल. चौथ्या फेरीत प्रभाग ९ व १०, पाचव्या फेरीत प्रभाग ११ व १२, तर सहाव्या फेरीत प्रभाग १३ व १४ ची मोजणी होणार आहे. सातव्या फेरीत प्रभाग १५ आणि जागा १ ब ची मोजणी होईल, तर शेवटच्या आठव्या फेरीत जागा २ ब व १५ ब चा निकाल स्पष्ट होईल.
मतमोजणी केंद्रावरील शिस्त आणि गर्दी टाळण्यासाठी प्रशासनाने कडक नियमावली जाहीर केली आहे. अध्यक्षपदाचे उमेदवार आणि त्यांचे अधिकृत प्रतिनिधी मतमोजणी संपेपर्यंत पूर्ण वेळ केंद्रात उपस्थित राहू शकतील. मात्र, नगरसेवकपदाच्या उमेदवारांसाठी आणि त्यांच्या प्रतिनिधींसाठी वेगळा नियम लागू असेल. नगरसेवकपदाचे उमेदवार आणि त्यांच्या प्रतिनिधींना केवळ त्यांच्या प्रभागाची फेरी सुरू असतानाच आत प्रवेश दिला जाईल. संबंधित फेरीची मोजणी पूर्ण होताच त्यांना केंद्राबाहेर जावे लागेल, असे उंडे यांनी स्पष्ट केले आहे. सर्व उमेदवार आणि त्यांच्या प्रतिनिधींनी या नियोजनाची नोंद घेऊन प्रशासनाला सहकार्य करावे, असे आवाहनही यावेळेस करण्यात आले आहे.
