दारूच्या विळख्यातून कुटुंबाला वाचवा; संगमनेरच्या जनजागरण सभेला नक्की या! अल्कोहोलिक ॲनॉनिमस सेवा समितीचा पुढाकार

संगमनेर | महाराष्ट्र संवाद न्यूज

दारूचे व्यसन हा केवळ एक स्वभावदोष नसून तो एक गंभीर मानसिक व शारीरिक आजार आहे, असे अमेरिकन मेडिकल असोसिएशननेही मान्य केले आहे. या आजारातून सावरण्यासाठी आणि मद्यपींना सन्मानाचे आयुष्य मिळवून देण्यासाठी ‘अल्कोहोलिक ॲनॉनिमस’ (ए.ए.) ही जागतिक संस्था गेल्या अनेक वर्षांपासून कार्य करत आहे. याच कार्याचा भाग म्हणून संगमनेर शहरात एका विशेष ‘जनजागरण सभे’चे आयोजन करण्यात आले आहे.

संगमनेरमधील नागरिकांसाठी ही सभा उद्या शनिवारी, (दिनांक २७ डिसेंबर) दुपारी चार ते सहा या वेळेमध्ये संगमनेरच्या भंडारी मंगल कार्यालयामध्ये आयोजित करण्यात आली आहे.

कोणासाठी आहे ही सभा?- ज्या व्यक्तींना स्वतःची दारू सोडण्याची मनापासून इच्छा आहे, किंवा ज्यांच्या घरात दारूच्या व्यसनामुळे वाद आणि दुःख निर्माण झाले आहे, अशा सर्व लोकांसाठी ही सभा अत्यंत महत्त्वाची ठरणार आहे. विशेष म्हणजे, या संस्थेत सहभागी होण्यासाठी कोणतेही शुल्क आकारले जात नाही; ही सेवा पूर्णपणे विनामूल्य आहे.

साप्ताहिक सभेचीही सोय- केवळ एक दिवसाची सभाच नाही, तर संगमनेरमध्ये सातत्यपूर्ण मार्गदर्शनासाठी ‘ए.ए. स्वीकार समूह’ कार्यरत आहे. याची साप्ताहिक सभा दर रविवारी सकाळी ११:०० ते १२:३० या वेळेत सह्याद्री ज्युनियर कॉलेज, नाशिक रोड, संगमनेर येथे पार पडत असते. या जनजागरण सभेबद्दल अधिक माहितीसाठी किंवा मदतीसाठी ९८५०१३९२०७, ७७६७०९१४२२, ७४९९०७७०४७, ९४२२६ ७५८४९ या मोबाईल क्रमांकावर संपर्क साधण्याचे आवाहन करण्यात आले आहे.

“व्यसनमुक्त व्हा, आनंदी जगा!” या मोहिमेत सहभागी होऊन जास्तीत जास्त नागरिकांनी या सुवर्णसंधीचा लाभ घ्यावा, अशी विनंती अल्कोहोलिक अॅनॉनिमस सेवा समिती (महाराष्ट्र राज्य) यांच्या वतीने करण्यात आली आहे.