संगमनेर | महाराष्ट्र संवाद न्यूज –
अहिल्यानगर जिल्ह्यामध्ये गोवंशीय जनावरांची कत्तल करणाऱ्यांविरुद्ध पोलिसांनी मोठी मोहीम उघडली आहे. पोलीस अधीक्षक सोमनाथ घार्गे यांच्या आदेशानुसार स्थानिक गुन्हे शाखेने (LCB) संगमनेर शहर परिसरात शुक्रवारी पहाटे दोन वेगवेगळ्या ठिकाणी धाडसी कारवाया केल्या. या कारवाईत पोलिसांनी ११ लाख ४५ हजार ७०० रुपये किमतीचा एकूण मुद्देमाल हस्तगत केला असून, कत्तलीसाठी आणलेल्या १६ गोवंशीय जनावरांची निर्दयतेच्या विळख्यातून सुटका केली आहे.
मदिनानगरमध्ये पहाटेची कारवाई-स्थानिक गुन्हे शाखेचे पोलीस निरीक्षक किरणकुमार कबाडी यांच्या मार्गदर्शनाखाली पथक संगमनेर शहर परिसरामध्ये गस्त घालत असताना, त्यांना मदिनानगर येथील गल्ली नंबर २ मध्ये एका पत्र्याच्या शेडमध्ये गोवंशीय जनावरांची कत्तल सुरू असल्याची खात्रीशीर माहिती मिळाली. पथकाने २६ डिसेंबर रोजी पहाटेच्या सुमारास त्या ठिकाणी छापा टाकला असता, तीन इसम जनावरांची कत्तल करताना मिळून आले. पोलिसांना पाहताच मुख्य आरोपी कासिफ असद कुरेशी हा अंधाराचा फायदा घेऊन पळून गेला, मात्र पोलिसांनी इतर दोन आरोपींना जागीच ताब्यात घेतले.
अटक करण्यात आलेल्यांमध्ये गुलाम फरिद जावेद कुरेशी (वय ३० वर्षे, रा. मोगलपुरा, संगमनेर) आणि मोहंमद वसीम मुबारक अली (वय ३२ वर्षे, रा. उत्तर प्रदेश, सध्या रा. मदिनानगर, संगमनेर) यांचा समावेश आहे. या ठिकाणाहून पोलिसांनी ९ लाख ३० हजार रुपये किमतीचे ३,११० किलो गोमांस आणि कत्तलीसाठी वापरली जाणारी ७०० रुपये किमतीची कुऱ्हाड व सुरी असा एकूण ९ लाख ३० हजार ७०० रुपयांचा मुद्देमाल जप्त केला आहे.
काटवनात लपवलेली १६ जनावरे मुक्त- या कारवाईनंतर मिळालेल्या गोपनीय माहितीच्या आधारे पोलिसांनी कोल्हेवाडी रोडवरील हाजीनगर येथील एका काटवनात छापा टाकला. तिथे २ लाख १५ हजार रुपये किमतीची एकूण १६ लहान-मोठी गोवंशीय जनावरे विना चारा-पाणी अत्यंत निर्दयतेने बांधून ठेवलेली आढळली. ही जनावरे मुद्दस्सर हाजी कुरेशी (रा. भारतनगर, संगमनेर) याने कत्तलीच्या उद्देशाने आणली असल्याची माहिती समोर आली आहे. पोलिसांनी या सर्व जनावरांची सुटका केली असून मुद्दस्सर कुरेशी सध्या फरार आहे.
या प्रकरणी संगमनेर शहर पोलीस ठाण्यात भारतीय न्याय संहिता २०२३ चे कलम २७१, ३२५, ३(५) सह महाराष्ट्र प्राणी संरक्षण अधिनियम आणि प्राण्यांचा छळ प्रतिबंधक अधिनियमाच्या विविध कलमान्वये दोन स्वतंत्र गुन्हे दाखल करण्यात आले आहेत.
ही यशस्वी कारवाई पोलीस अधीक्षक सोमनाथ घार्गे यांच्या सुचना व मार्गदर्शनाखाली स्थानिक गुन्हे शाखेचे पोलीस निरीक्षक किरणकुमार कबाडी, पोलीस उपनिरीक्षक महादेव गुट्टे, पोलीस अंमलदार गणेश लोंढे, संतोष खैरे, अमृत आढाव, आमेल आजबे आणि अरुण मोरे यांच्या पथकाने केली आहे.
