संगमनेर | महाराष्ट्र संवाद न्यूज
स्थानिक गुन्हे शाखेच्या पथकाने संगमनेर तालुक्यातील घारगाव पोलीस ठाणे हद्दीत मोठी कारवाई केली. या कारवाईत मुळा नदीपात्रातून विनापरवाना वाळूची वाहतूक करणारा १० लाख रुपये किमतीचा डंपर जप्त करण्यात आला असून दोन आरोपींविरुद्ध गुन्हा दाखल करण्यात आला आहे.
अवैध वाळू उपसा आणि वाहतूक करणाऱ्यांविरुद्ध जिल्हा पोलीस प्रशासनाने आता थेट कारवाईचा बडगा उगारला आहे. जिल्हा पोलीस अधीक्षक सोमनाथ घार्गे यांच्या विशेष आदेशानुसार स्थानिक गुन्हे शाखेच्या पथकाने संगमनेरमध्ये ही कारवाई केली.
पोलीस निरीक्षक किरणकुमार कबाडी यांच्या मार्गदर्शनाखाली पथक शुक्रवारी २६ डिसेंबर रोजी संगमनेर भागात गस्तीवर होते. दरम्यान, बोटा शिवारातील कुरकुंडी फाटा येथे एक अशोक लेलँड कंपनीचा डंपर संशयास्पद स्थितीत उभा असल्याची माहिती गुप्त बातमीदाराकडून पथकाला मिळाली. पथकाने तातडीने त्या ठिकाणी धाव घेऊन डंपरची (क्र. एम.एच. १४ एल.एक्स. ७२९७) तपासणी केली असता, त्यामध्ये १० लाख रुपये किमतीचा डंपर आणि २० हजार रुपये किमतीची २ ब्रास चोरटी वाळू असा एकूण १० लाख २० हजार रुपयांचा मुद्देमाल आढळून आला.
यावेळी पोलिसांनी डंपर चालक पिलाजी महादु नंदकर (वय ४१, रा. शेळकेवाडी, ता. संगमनेर) याला ताब्यात घेऊन विचारपूस केली असता, त्याने सदर वाळू वाहतुकीचा कोणताही परवाना नसल्याचे कबूल केले. अधिक चौकशीत हा डंपर चेतन रामनाथ कजबे (रा. खंदरमाळवाडी, ता. संगमनेर) याच्या मालकीचा असून त्याच्या सांगण्यावरून मुळा नदीपात्रातून ही वाळू चोरून आणल्याची माहिती चालकाने दिली. या प्रकरणी पोलीस कॉन्स्टेबल अमृत शिवाजी आढाव यांच्या फिर्यादीवरून घारगाव पोलीस ठाण्यात भारतीय न्याय संहिता २०२३ चे कलम ३०३(२) व ३(५) प्रमाणे गुन्हा दाखल करण्यात आला आहे.
ही धाडसी कारवाई स्थानिक गुन्हे शाखेचे पोलीस उपनिरीक्षक महादेव गुट्टे, पोलीस अंमलदार गणेश लोंढे, संतोष खैरे, अमृत आढाव, अमोल आजबे आणि अरुण मोरे यांच्या पथकाने यशस्वी केली.
