प्रतिनिधी –
कॅफेच्या नावाखाली तरुण-तरुणींना अश्लील कृत्यांसाठी जागा उपलब्ध करून देणाऱ्या दोन मोठ्या कॅफेंवर पोलिसांनी धाड टाकून मोठी कारवाई केली आहे. या कारवाईमुळे शहरात खळबळ उडाली असून, तासाच्या हिशोबाने जागा भाड्याने देणाऱ्या मालकांचे धाबे दणाणले आहेत.
कर्जत शहरातील मुख्य रस्त्यावरील एका कॉम्प्लेक्समध्ये असलेल्या ‘आपलं कॅफे’ आणि ‘मराठी कॅफे’ या दोन ठिकाणी तरुण मुला-मुलींना अश्लील चाळे करण्यासाठी खाजगी जागा उपलब्ध करून दिली जात असल्याची गोपनीय माहिती पोलिसांना मिळाली होती. हे कॅफे चालक केवळ जागेचे पैसे घेऊन अशा कृत्यांना प्रोत्साहन देत होते.
मिळालेल्या माहितीनुसार, ३० डिसेंबर रोजी दुपारी १ च्या सुमारास पोलिसांनी या दोन्ही कॅफेंवर अचानक छापा टाकला. यावेळी तिथे धक्कादायक प्रकार सुरू असल्याचे उघडकीस आले. हे चालक केवळ अश्लील कृत्यांसाठी जागाच देत नव्हते, तर कोणत्याही अधिकृत परवान्याशिवाय खाद्यपदार्थांची विक्री देखील करत असल्याचे तपासात समोर आले आहे.
या प्रकरणी पोलीस कॉन्स्टेबल संजय मच्छिंद्र सानप यांनी फिर्याद दिली असून, दोन्ही कॅफेच्या मालकांविरुद्ध मुंबई पोलीस कायदा कलम ३३ (x)(अ)/१३१ नुसार गुन्हा दाखल करण्यात आला आहे. ही कारवाई उपविभागीय पोलीस अधिकारी प्रवीणचंद लोखंडे यांच्या मार्गदर्शनाखाली पोलीस निरीक्षक सोपान शिरसाठ व त्यांच्या पथकाने केली आहे.
