अहिल्यानगर: राजूर आणि अकोले परिसरातील विद्युत रोहित्रांमधील कॉपरची चोरी करणाऱ्या आंतरजिल्हा टोळीला जेरबंद करण्यात स्थानिक गुन्हे शाखेला यश आले आहे. या कारवाईत पोलिसांनी ४ आरोपींना अटक केली असून त्यांच्याकडून चोरीचे कॉपर आणि गुन्ह्यात वापरलेली १५ लाख रुपये किमतीची इनोव्हा कार असा एकूण १५,६५,००० रुपयांचा मुद्देमाल हस्तगत केला आहे.
नोव्हेंबर २०२५ मध्ये कोहंडी (ता. अकोले) येथील धरणाजवळील एक विद्युत रोहित्र अज्ञात चोरट्यांनी उघडून त्यातील ३,५०,००० रुपये किमतीची कॉपर चोरून नेली होती. याप्रकरणी स्वप्नील सुरेश कोकणे यांनी राजूर पोलीस ठाण्यात फिर्याद दाखल केली होती. अकोले परिसरात अशा चोऱ्यांचे प्रमाण वाढल्याने पोलीस अधीक्षक सोमनाथ घार्गे यांनी स्थानिक गुन्हे शाखेचे पोलीस निरीक्षक किरणकुमार कबाडी यांना गुन्हे उघडकीस आणण्याचे आदेश दिले होते.
गुन्हे शाखेच्या पथकाने पुणे आणि नाशिक जिल्ह्यात समांतर तपास सुरू केला होता. तपासादरम्यान तांत्रिक कौशल्याच्या आधारे सुखरुप सुखदेव नांगरे (रा. हिवरे तर्फे, जि. पुणे) याने त्याच्या साथीदारांसह हा गुन्हा केल्याची खात्रीशीर माहिती मिळाली. पोलिसांनी सापळा रचून सुखरुप नांगरे याला नारायणगाव परिसरातून ताब्यात घेतले. त्याची सखोल चौकशी केली असता, त्याने चोरीचा माल पुणे येथील एका भंगार दुकानदाराला विकल्याची कबुली दिली.
या कारवाईत पोलिसांनी सुखरुप सुखदेव नांगरे (वय २४, रा. हिवरे तर्फे, पुणे), सागर शिवराम जाधव (रा. महाळुंगे पडवळ, पुणे), शैलेश बाळू पारधी (रा. महाळुंगे पडवळ, पुणे) आणि चोरीचा माल घेणारा मोहंमद तल्हा मोहंमद जुबेर (रा. वाल्हेकरवाडी, पुणे) यांना अटक केली आहे. या टोळीकडून ६५,००० रुपयांचे कॉपर आणि १५ लाख रुपयांची इनोव्हा कार (क्र. MH 12 EX 4340) जप्त करण्यात आली आहे. तसेच या टोळीतील भास्कर केवळ (रा. निमदरी, जुन्नर) आणि सुनील खंडागळे (रा. जवळके, खेड) हे दोन आरोपी अद्याप फरार असून पोलीस त्यांचा शोध घेत आहेत.
या टोळीच्या अटकेमुळे राजूर पोलीस ठाण्यातील दोन आणि पुणे जिल्ह्यातील शिरूर पोलीस ठाण्यातील एक असे एकूण तीन गंभीर गुन्हे उघडकीस आले आहेत. एलसीबी चे पोलीस निरीक्षक किरण कुमार कबाडी यांच्या मार्गदर्शनाखाली उपनिरीक्षक समीर अभंग, विजय पवार, संतोष खैरे, गणेश लोंढे, फुरखान शेख, अमृत आढाव, योगेश कर्डिले, महादेव भांड यांच्या पथकाने ही कामगिरी केली. आरोपींना पुढील तपासासाठी राजूर पोलिसांच्या स्वाधीन करण्यात आले आहे. ही कारवाई स्थानिक गुन्हे शाखेच्या पथकाने यशस्वीरित्या पूर्ण केली.
