संगमनेर, प्रतिनिधी-
जादुटोणा करून ‘सर्व चांगले करून देतो’ असे आमिष दाखवून एका कुटुंबाची आर्थिक फसवणूक केल्याचा धक्कादायक प्रकार अहिल्यानगर जिल्ह्यातील घारगांव पोलीस ठाण्याच्या हद्दीत उघडकीस आला आहे. संमोहनाचा वापर करून आरोपीने फिर्यादीच्या आईकडून सुमारे ५ लाख रुपयांची रोकड, सोन्याचे दागिने आणि पशुधन लांबवल्याचा आरोप तक्रारीत करण्यात आला आहे.
मिळालेल्या माहितीनुसार, जांबुत खुर्द (हाळदा वस्ती) येथील रहिवासी शरद कैलास डोंगरे यांनी याप्रकरणी फिर्याद दिली आहे. सन २०१४ मध्ये आरोपी बाळासाहेब पोटे आणि त्याच्या एका साथीदाराने फिर्यादीच्या घरी जाऊन ‘तुमचं सर्व चांगलं करतो’ असे सांगून जादुटोणा करण्याच्या बहाण्याने ५ हजार रुपये आणि एक बकरी नेली होती. त्यानंतर आरोपीने फिर्यादीच्या आईशी संपर्क वाढवून त्यांना आपल्या जाळ्यात ओढले.
२०१५ मध्ये आरोपीने फिर्यादीच्या आईला संमोहित करून १,५०,००० रुपये घेतले. जुलै २०२५ मध्ये देखील आश्रमाच्या नावाखाली धान्य आणि रोकड नेण्यात आली. कालांतराने घरात तपासणी केली असता आईचे आणि भावजयीचे मिळून १,४९,२५५ रुपये किमतीचे सोन्याचे दागिने गहाळ असल्याचे आढळले. तसेच, घरातील हिशोबात ५,००,००० रुपयांहून अधिक रक्कम कमी दिसून आली. आईने हे दागिने आणि पैसे बाळासाहेब पोटे याला दिल्याची कबुली दिली आहे.
या प्रकाराबाबत घरात विचारणा केली असता, फिर्यादीच्या आईने सर्वांना मारहाण करून स्वतः आत्महत्येचा प्रयत्न केला. त्यानंतर त्यांची प्रकृती बिघडल्याने त्यांना अहिल्यानगर येथील डॉ. करंदीकर हॉस्पिटलमध्ये मानसोपचारासाठी दाखल करण्यात आले होते. मानसिक संतुलन बिघडलेले असतानाही त्या आजही आरोपीच्या संपर्कात असल्याचे फिर्यादीत म्हटले आहे.
घारगांव पोलिसांनी याप्रकरणी बाळासाहेब पोटे आणि सिंधु बाळासाहेब पोटे यांच्या विरुद्ध ‘महाराष्ट्र नरबळी आणि इतर अमानुष, अनिष्ट व अघोरी प्रथा व जादुटोणा प्रतिबंधक अधिनियम २०१३’ च्या कलम २(ब) आणि ३(२) नुसार गुन्हा दाखल केला आहे. २ जानेवारी २०२६ रोजी हा गुन्हा नोंदवण्यात आला असून पोलीस हेड कॉन्स्टेबल आदिनाथ गंधाले या प्रकरणाचा अधिक तपास करत आहेत.
