संगमनेर, प्रतिनिधी-
शहरात चोऱ्यांचे सत्र थांबण्याचे नाव घेत नसून, आता वर्दळीच्या बस स्थानकावर चोरट्यांनी आपला हात साफ केला आहे. शनिवारी दुपारी बस स्थानकावर गर्दीचा फायदा घेत अज्ञात चोरट्यांनी एका महिलेच्या गळ्यातील सुमारे दोन लाख रुपये किमतीचे सोन्याचे मंगळसूत्र हातोहात लांबविले. या घटनेमुळे प्रवाशांमध्ये भीतीचे वातावरण पसरले आहे.
घारगाव (ता. संगमनेर, जिल्हा अहिल्यानगर) येथील रहिवासी आशालता मनोहर आहेर या आपल्या पतीसह नातेवाईकांना भेटण्यासाठी संगमनेरमार्गे अकोल्याला जात होत्या. शनिवारी दुपारी संगमनेर बस स्थानकावर बसची वाट पाहत असताना आणि बसमध्ये चढण्याच्या गडबडीत अज्ञात चोरट्यांनी त्यांच्या गळ्यातील दोन तोळ्यांहून अधिक वजनाचे सोन्याचे मंगळसूत्र अत्यंत शिताफीने चोरले.
मंगळसूत्र चोरीला गेल्याचे लक्षात येताच आहेर यांनी तातडीने संगमनेर शहर पोलीस ठाण्यात धाव घेतली. याप्रकरणी पोलिसांनी गुन्हा दाखल केला असून पुढील तपास पोलीस हेडकॉन्स्टेबल हासे करत आहेत.
प्रवाशांच्या सुरक्षेचा प्रश्न पुन्हा ऐरणीवर- संगमनेर बस स्थानकावर गेल्या काही दिवसांपासून पाकीटमारी आणि दागिने चोरीच्या घटनांमध्ये मोठी वाढ झाली आहे. सीसीटीव्ही आणि पोलीस बंदोबस्त असतानाही चोरटे बिनदिक्कतपणे चोऱ्या करत असल्याने पोलिसांसमोर मोठे आव्हान उभे राहिले आहे.
