संगमनेर | प्रतिनिधी
शहरात व परिसरात मकरसंक्रांत सणाच्या काळात नायलॉन मांजा विक्री करणाऱ्या विक्रेत्यांवर तातडीने कारवाई करून विक्रीसाठी आलेला साठा जप्त करावा, अशा कडक सूचना आमदार अमोल खताळ यांनी पोलीस अधिकारी आणि पालिका प्रशासनास दिल्या आहेत.
आमदार खताळ यांच्या कार्यालयाकडून देण्यात आलेल्या माहितीत म्हटले आहे की, नायलॉन मांजाचे अनेक दुष्परिणाम होत असून या जीवघेण्या मांजामुळे अनेक नागरिक आणि मुले जखमी होण्याच्या घटनांचे गांभीर्य मोठे आहे, असे त्यांनी यावेळी नमूद केले.
हा मांजा मानवी जीवनासह पशू-पक्ष्यांसाठीही जीवघेणा ठरत असल्याने त्याचा वापर, साठवणूक आणि विक्री पूर्णपणे बंद करणे गरजेचे आहे. नायलॉन मांजाची चोरटी विक्री रोखण्यासाठी शहरातील उपनगरांमधील सर्व दुकानदारांना सूचना देऊन त्यांच्यावर करडी नजर ठेवावी.
केवळ मांजा जप्त करून न थांबता, नियम मोडणाऱ्या दुकानदारांवर दंडात्मक किंवा फौजदारी कारवाई करण्याबाबतचे स्पष्ट आदेशही आ. खताळ यांनी प्रशासनाला दिले आहेत. नागरिकांच्या जीविताशी खेळ करणाऱ्यांची गय केली जाणार नाही, असा इशाराही त्यांनी यावेळी दिला. ‘नायलॉन मांजामुक्त संगमनेर’ घडवण्यासाठी प्रशासनाला पूर्ण सहकार्य करावे, असे आवाहन करत आ. खताळ यांनी सुरक्षित सण साजरा करण्याचे संकेत दिले आहेत.
