नायलॉन मांजा विरोधात संगमनेर शहर भाजप आक्रमक; कारवाई न झाल्यास स्वतः करणार ‘ही’ कृती!

संगमनेर: प्रतिनिधी

मकर संक्रांतीचा सण जवळ येत असतानाच संगमनेर शहरात नायलॉन मांजामुळे अपघातांचे सत्र सुरू झाले आहे. गेल्या काही दिवसांत शहरात घडलेल्या चार-पाच गंभीर घटनांमुळे नागरिक संतप्त झाले असून, आता याविरोधात संगमनेर शहर भाजप आक्रमक झाली आहे. बंदी असलेल्या नायलॉन आणि चिनी मांजाची विक्री करणाऱ्यांवर कडक कारवाई करावी, अन्यथा कार्यकर्ते स्वतः रस्त्यावर उतरून कारवाई करतील, असा इशारा प्रशासनाला देण्यात आला आहे.

शहरात नुकत्याच घडलेल्या काही घटनांमध्ये पादचारी आणि दुचाकीस्वारांच्या गळ्याला, कानाजवळ नायलॉन मांजा अडकून गळा, कान कापला जाण्याचे प्रकार घडले आहेत. नायलॉन मांजावर शासनाची बंदी असूनही शहरातील काही दुकानदार छुप्या पद्धतीने याची विक्री करत असल्याचे समोर आले आहे. या गंभीर प्रकाराची दखल घेत भाजप कार्यकर्त्यानी शहर पोलीस निरीक्षक समीर बारवकर आणि नगरपालिका मुख्याधिकारी दयानंद गोरे यांना निवेदन दिले.

या निवेदनात नमूद करण्यात आले आहे की, मकर संक्रांतीच्या पार्श्वभूमीवर शहरात पतंग आणि मांजाची विक्री मोठ्या प्रमाणावर सुरू आहे. मात्र, नायलॉन मांजामुळे गळ्याला इजा झाल्यास प्राणघातक दुर्घटना घडू शकते, त्यामुळे प्रशासनाने तत्काळ मांजा विक्रेत्यांच्या दुकानांवर धाडी टाकून अवैध साठा जप्त करावा.

युवा कार्यकर्ते कल्पेश पोगुल यांनी आपला अनुभव सांगताना नमूद केले की, दोन दिवसांपूर्वी ते आपल्या लहान पुतण्याला घेऊन दुचाकीवरून जात असताना मांजा त्यांच्या पुतण्याच्या गळ्याला अडकला होता. सुदैवाने वेळीच लक्ष गेल्याने मोठी दुर्घटना टळली. या पार्श्वभूमीवर दुचाकीस्वारांनी सावधानता बाळगावी आणि लहान मुलांना गाडीवर पुढे बसवू नये, असे आवाहनही त्यांनी केले आहे.

प्रशासनाने जर तातडीने कठोर पावले उचलली नाहीत, तर नागरिकांच्या जिवाशी खेळणाऱ्या या विक्रेत्यांविरोधात भाजप कार्यकर्ते स्वतः कारवाई करतील, असा इशारा यावेळी देण्यात आला. निवेदन देताना भाजपचे जिल्हा सचिव सीताराम भांगरे, ज्येष्ठ नेते राम जाजू, जिल्हा सचिव राजेंद्र सांगळे, मुकुंद उपरे, दिनेश सोमाणी, हर्षवर्धन खुळे, कल्पेश पोगुल, योगेश सूर्यवंशी, जगन्नाथ शिंदे यांसह अनेक पदाधिकारी व कार्यकर्ते उपस्थित होते.