संगमनेर, प्रतिनिधी –
संगमनेरमध्ये चोरीच्या घटनांनी अक्षरशः कहर केला असून, सामान्य नागरिक आता घरातही सुरक्षित राहिलेले नाहीत. घुलेवाडी परिसरात एका बंद घराचे कुलूप तोडून चोरट्याने सोन्या-चांदीच्या दागिन्यांसह रोकड लंपास केल्याची खळबळजनक घटना उघडकीस आली आहे. विशेष म्हणजे, या प्रकरणात पोलिसांनी आरोपीची ओळख पटवली असून त्याच्यावर गुन्हा दाखल करण्यात आला आहे.
घुलेवाडी येथील रहिवासी सुरेखा तुकाराम मधे यांचे घर चोरट्याने लक्ष्य केले. घराच्या कडी-कोंडा तोडून आत प्रवेश करत चोरट्याने घरातील पेटीचे कुलूप शिताफीने फोडले. या पेटीत ठेवलेले सोन्या-चांदीचे दागिने आणि रोख रक्कम असा एकूण ८२ हजार रुपयांचा मुद्देमाल चोरून नेला. चोरीच्या या सत्रामुळे परिसरात घबराटीचे वातावरण पसरले आहे.
याप्रकरणी सुरेखा मधे यांनी दिलेल्या फिर्यादीवरून संगमनेर शहर पोलीस ठाण्यात गुन्हा नोंदवण्यात आला आहे. तपासादरम्यान आरोपीचे नाव समोर आले असून, अजय रंगनाथ पवार (रा. संगमनेर साखर कारखाना) याच्याविरोधात गुन्हा दाखल करण्यात आला आहे.
या गुन्ह्याचा पुढील तपास पोलीस निरीक्षक समीर बारवकर यांच्या मार्गदर्शनाखाली पोलीस हेडकॉन्स्टेबल लुमा भांगरे करत आहेत.
- पोलिसांसमोर सुरक्षेचे मोठे आव्हान – संगमनेर शहरात घरफोड्यांचे सत्र थांबण्याचे नाव घेत नाहीये. चोरटे पोलिसांना खुलेआम आव्हान देत असताना, गस्त वाढवण्याची मागणी नागरिकांकडून जोर धरत आहे. भरवस्तीत आणि उपनगरांमध्ये होणाऱ्या या चोऱ्यांमुळे “पोलिसांचा धाक संपला आहे का?” असा संतप्त सवाल नागरिक विचारत आहेत.
