लोकशाहीला गालबोट: आनंद विद्यालयात बनावट कार्डांचा साठा, दोन संशयित पोलिसांच्या जाळ्यात; प्रशासनाकडून चौकशीचे आदेश

अहिल्यानगर –

अहिल्यानगर महानगरपालिका सार्वत्रिक निवडणुकीच्या मतदान प्रक्रियेला आज बनावट ओळखपत्रांच्या एका मोठ्या प्रकरणाने गालबोट लागले. प्रभाग क्रमांक ३ मधील आनंद विद्यालय मतदान केंद्र परिसरात बनावट निवडणूक ओळखपत्रे आणि आधार कार्डांचा मोठा साठा बाळगणाऱ्या दोन संशयितांना पोलिसांनी रंगेहात पकडले. या कारवाईमुळे राजकीय वर्तुळात मोठी खळबळ उडाली असून प्रशासनाने या प्रकरणाच्या सखोल चौकशीचे आदेश दिले आहेत.

​मिळालेल्या माहितीनुसार, आनंद विद्यालय केंद्रावर मतदान सुरू असताना दोन व्यक्तींच्या हालचाली संशयास्पद वाटल्या. काही उमेदवारांनी आणि त्यांच्या प्रतिनिधींनी सतर्कता दाखवत या व्यक्तींची झडती घेतली असता, त्यांच्याकडे वेगवेगळ्या नावांची शेकडो बनावट निवडणूक ओळखपत्रे आणि आधार कार्ड आढळून आली. एकाच व्यक्तीकडे इतक्या मोठ्या प्रमाणात ओळखपत्रे सापडल्याने उपस्थित उमेदवारांनी तीव्र संताप व्यक्त करत जोरदार आक्षेप नोंदवला. यामुळे केंद्र परिसरात काही काळ तणावाचे वातावरण निर्माण झाले होते.

​या घटनेची माहिती मिळताच प्रभाग क्रमांक ३ चे निवडणूक निर्णय अधिकारी सुधीर पाटील यांनी तत्काळ घटनास्थळी धाव घेतली आणि परिस्थितीची पाहणी केली. त्यांनी या प्रकरणाची गंभीर दखल घेत संशयित इसमांना तोफखाना पोलिसांच्या स्वाधीन केले. सुधीर पाटील यांनी प्रसारमाध्यमांशी बोलताना स्पष्ट केले की, संबंधित व्यक्तींकडे बनावट कागदपत्रे आढळल्याच्या तक्रारी प्राप्त झाल्या होत्या, त्यानुषंगाने ही कारवाई करण्यात आली आहे.

सध्या तोफखाना पोलीस ठाण्यात या दोन्ही संशयितांची कसून चौकशी सुरू आहे. ही बनावट ओळखपत्रे कोठून आणली, ती कोणासाठी तयार करण्यात आली होती आणि यामागे मोठे रॅकेट आहे का, याचा शोध पोलीस घेत आहेत. चौकशीतून निष्पन्न होणाऱ्या तथ्यांच्या आधारे संबंधितांवर कठोर कायदेशीर कारवाई केली जाणार असल्याचे प्रशासनाकडून सांगण्यात आले आहे.

​निवडणूक प्रक्रिया पारदर्शक, मुक्त आणि निर्भय वातावरणात पार पाडण्यासाठी प्रशासन कटिबद्ध असून मतदारांनी कोणत्याही अफवांवर विश्वास ठेवू नये, असे आवाहनही निवडणूक निर्णय अधिकारी सुधीर पाटील यांनी यावेळी केले आहे.