लग्नाचे आमिष दाखवून तरुणीवर अत्याचार; फोटो व्हायरल करण्याची धमकी देणाऱ्या तरुणावर गुन्हा दाखल

महाराष्ट्र संवाद न्यूज ऑनलाईन – 

लग्नाचे आमिष दाखवून एका २० वर्षीय तरुणीवर वारंवार अत्याचार केल्याची धक्कादायक घटना छत्रपती संभाजीनगरच्या वाळूज एमआयडीसी पोलीस ठाण्याच्या हद्दीत उघडकीस आली आहे. लग्नास नकार दिल्यावर आरोपीने तरुणीला जीवे मारण्याची आणि तिचे फोटो सोशल मीडियावर व्हायरल करण्याची धमकी दिल्याने परिसरात खळबळ उडाली आहे.

मिळालेल्या माहितीनुसार, पीडित तरुणी (वय २०, रा. यवतमाळ) हिची ओळख आरोपी नितीन ज्ञानेश्वर पायगव्हाण (वय २४, रा. राजणगाव, ता. गंगापूर) याच्याशी झाली होती. आरोपीने पीडितेशी जवळीक साधून तिला लग्नाचे आमिष दाखवले. डिसेंबर २०२३ पासून ते ५ जानेवारी २०२६ या कालावधीत राजणगाव येथील शिवनेरी कॉलनी भागात आरोपीने पीडितेच्या इच्छेविरुद्ध तिच्यावर वारंवार शारीरिक अत्याचार केले.

काही काळानंतर पीडितेने लग्नासाठी विचारणा केली असता, आरोपीने लग्नास स्पष्ट नकार दिला. इतकेच नाही तर, या प्रकरणाची कुठेही वाच्यता केल्यास तिला जीवे मारण्याची धमकी दिली. पीडितेच्या भावालाही मोबाईलवरून फोन करून धमकावण्यात आले. तसेच, पीडितेचे फोटो व्हायरल करण्याची धमकी देऊन तिचा मानसिक छळ करण्यात आला.

सततच्या छळाला कंटाळून अखेर पीडित तरुणीने एमआयडीसी वाळूज पोलीस ठाणे गाठून तक्रार दिली. तरुणीच्या तक्रारीवरून पोलिसांनी आरोपी नितीन पायगव्हाण याच्याविरुद्ध गंभीर कलमान्वये गुन्हा दाखल केला आहे.

या प्रकरणाचा पुढील तपास पोलीस निरीक्षक यांच्या मार्गदर्शनाखाली सहाय्यक पोलीस निरीक्षक सुषमा पवार या करत आहेत.