बहुमताच्या महासागरात ‘ती’ ठरली वरचढ; सत्ताधाऱ्यांची कसरत, पण ‘त्या’ एकमेव नगरसेविकेने पालिकेच्या तब्बल अर्धा डझन समित्यांवर मारली बाजी!

संगमनेर | अनंत पांगारकर – 
संगमनेर नगरपालिकेच्या विषय समित्यांच्या निवडी काल (सोमवारी) पार पडल्या असून, यामध्ये एका महिला नगरसेविकेची कामगिरी सध्या संपूर्ण जिल्ह्याच्या राजकीय वर्तुळात चर्चेचा विषय ठरली आहे. सत्तेत असलेल्या नगरसेवकांना देखील ज्या समित्यांवर स्थान मिळवण्यासाठी मोठी कसरत करावी लागली, तिथे विरोधी पक्षाच्या एकमेव महिला नगरसेविकेने सर्वच समित्यांवर आपले स्थान निश्चित करून एक नवा राजकीय विक्रम प्रस्थापित केला आहे.
सोमवारी निवडणूक निर्णय अधिकारी तथा तहसीलदार धीरज मांजरे यांच्या अध्यक्षतेखाली आणि नगराध्यक्ष डॉ. मैथिली तांबे तसेच उपनगराध्यक्ष नूरमोहम्मद शेख यांच्या उपस्थितीत पार पडलेल्या विशेष सभेत या निवडीवर अधिकृत शिक्कामोर्तब करण्यात आले. संगमनेर पालिकेत आमदार सत्यजित तांबे यांच्या नेतृत्वाखालील सेवा समितीचे २७ नगरसेवकांसह एकहाती वर्चस्व असून दोन अपक्ष नगरसेवकांनीही सत्ताधारी गटाला पाठिंबा दिला आहे. मात्र, या प्रचंड बहुमताच्या गर्दीतही विरोधी बाकावर बसणाऱ्या शिवसेनेच्या एकमेव महिला नगरसेविका साक्षी विनोद सूर्यवंशी यांनी सर्वसमावेशक संधी मिळवत सर्वांचे लक्ष वेधून घेतले आहे.
विशेष म्हणजे, सत्ताधारी सेवा समितीच्या नगरसेवकांना जास्तीत जास्त दोन समित्यांवर काम करण्याची संधी मिळाली आहे. अर्धा डझन समित्यांमध्ये स्थान मिळवण्यासाठी सत्ताधारी गटात मोठी चढाओढ आणि रस्सीखेच पाहायला मिळत असताना, विरोधी पक्षाच्या साक्षी सूर्यवंशी यांची मात्र महिला व बालकल्याण, शिक्षण-क्रीडा व सांस्कृतिक कार्य, सार्वजनिक बांधकाम, स्वच्छता वैद्यक आणि सार्वजनिक आरोग्य, पाणीपुरवठा व जलनिस्सारण, तसेच नियोजन आणि विकास अशा सर्व सहा महत्त्वाच्या समित्यांवर सदस्य म्हणून वर्णी लागली आहे.
नगरपालिकेच्या इतिहासात एकाच वेळी सर्वच विषय समित्यांवर सदस्य म्हणून निवड होणाऱ्या त्या एकमेव महिला सदस्य ठरल्या आहेत. जरी तांत्रिक कारणास्तव त्यांना महत्त्वाच्या समजल्या जाणाऱ्या स्थायी समितीवर स्थान मिळू शकले नसले, तरी पालिकेच्या इतर सर्व विभागांच्या कामकाजात त्यांचा आता थेट सहभाग राहणार आहे. बहुमताच्या महासागरात ‘ती’ वरचढ ठरल्याची चर्चा आता रंगू लागली आहे.
सत्ताधारी नगरसेवकांपेक्षाही अधिक समित्यांवर काम करण्याची संधी या एकमेव महिला लोकप्रतिनिधीला मिळाल्याने, आगामी काळात पालिकेच्या सभागृहात त्यांचा वावर आणि प्रशासनावर असणारा प्रभाव निश्चितच लक्षवेधी ठरणार असल्याचे स्पष्ट झाले आहे. एका बाजूला सत्ताधाऱ्यांचे संख्याबळ आणि दुसऱ्या बाजूला एकट्या साक्षी सूर्यवंशी यांचा सहा समित्यांमधील दबदबा, असा सामना आता संगमनेर पालिकेत पाहायला मिळणार आहे.