शाळा परिसरातील तंबाखू विक्री बंद करा, अन्यथा आंदोलनाचा इशारा; ‘Team-RGSS’चे संगमनेर पोलिसांना निवेदन

संगमनेर, प्रतिनिधी – 

संगमनेर शहरातील शाळा आणि महाविद्यालयांच्या १०० यार्ड परिसरात बेकायदेशीरपणे सुरू असलेली तंबाखूजन्य पदार्थ, गुटखा आणि सिगारेटची विक्री तात्काळ बंद करण्यात यावी, या मागणीसाठी राहुल गांधी समर्थक संघाच्या वतीने (Team-RGSS) संगमनेर शहर पोलीस ठाण्याचे पोलीस निरीक्षक समीर बारवकर यांना निवेदन देण्यात आले. प्रशासनाने तातडीने कारवाई न केल्यास तीव्र जनआंदोलन छेडण्याचा इशाराही यावेळी देण्यात आला.

निवेदनात म्हटले आहे की, तंबाखू नियंत्रण कायदा (COTPA) २००३ नुसार शैक्षणिक संस्थेच्या परिसरात तंबाखूजन्य पदार्थांच्या विक्रीवर सक्त मनाई असतानाही संगमनेरमध्ये अनेक ठिकाणी शाळांच्या अगदी जवळ पानटपऱ्या आणि दुकानांमधून सर्रास गुटखा व सिगारेट विक्री सुरू आहे. यामुळे विद्यार्थ्यांचे आरोग्य व भविष्य धोक्यात येत असून, हा कायद्याचा उघड अवमान आहे.

शहरातील शैक्षणिक संस्थांच्या परिसरात विशेष मोहीम राबवून अवैध विक्रेत्यांवर गुन्हे दाखल करावेत आणि दुकाने सील करावीत, अशी ठाम मागणी टीम आरजीएसएसच्या वतीने करण्यात आली आहे.

या निवेदनावर समन्वयक सतीश खताळ, अमोल शेलकर, राम अरगडे, अरुण चव्हाण, मोहसीन शेख, प्रकाश कडलग, रवींद्र हासे, अरुण जाधव, संजय बागुल, सोमनाथ हासे आणि प्रवीण हासे यांच्या स्वाक्षऱ्या आहेत.