साकूर ग्रामपंचायतीच्या ‘नक्षत्र घनवना’चा जिल्हाधिकाऱ्यांकडून गौरव; पुन्हा भेटीला येईल, जिल्हाधिकाऱ्यांनी दिला शब्द

संगमनेर, प्रतिनिधी – 

साकूरमधील नाविन्यपूर्ण प्रकल्प आणि ग्रामपंचायतीचे नेटके नियोजन पाहून जिल्हाधिकारी अक्षरशः भारावून गेले होते. यावेळी त्यांनी साकूर ग्रामपंचायतीच्या कामांचे तोंडभरून कौतुक केले आणि साकूरला पुन्हा एकदा भेट देण्यासाठी नक्की येईल, असा शब्दही कृषी उत्पन्न बाजार समितीचे सभापती शंकरराव खेमनर यांना दिला.

गावांच्या सर्वांगीण विकासासाठी राज्यभर राबविल्या जाणाऱ्या मुख्यमंत्री समृद्ध पंचायतराज अभियाना अंतर्गत संगमनेर तालुक्यातील साकूर ग्रामपंचायतीने केलेल्या लोकाभिमुख कामांची अहिल्यानगरचे जिल्हाधिकारी डॉ. पंकज आशिया यांनी गुरुवारी (दि. २२ जानेवारी) प्रत्यक्ष पाहणी केली. 

जिल्हाधिकारी डॉ. पंकज आशिया यांनी साकूर शिवारातील खंडोबा डोंगराच्या पायथ्याशी ग्रामपंचायतीने विकसित केलेल्या नक्षत्र घनवन उद्यान व तुलसी वृंदावनाची बारकाईने पाहणी केली. विशेषतः महर्षि पराषर व महर्षी वराहमिहीर यांच्या ‘गुल्म वृक्षा आयुर्वेद’ ग्रंथावर आधारित नक्षत्र घनवन वृक्ष लागवड येथे करण्यात आली आहे. या वृंदावनात ४४ प्रकारच्या विविध जातींची २ हजार ९६० झाडे लावण्यात आली असून, ही माहिती कृषी विस्तार अधिकारी अजितदानंद पावसे यांनी जिल्हाधिकाऱ्यांना दिली. 

हा महाराष्ट्रातील अशा प्रकारचा पहिलाच प्रयोग असल्याचे पाहून जिल्हाधिकाऱ्यांनी समाधान व्यक्त केले. त्यानंतर त्यांनी दगड, चुना, माती व गवतापासून बनविलेल्या पारंपरिक वनराई बंधाऱ्यांची पाहणी केली.

गावातील कचरा व्यवस्थापन आणि पाणी प्रश्नावर कायमस्वरूपी तोडगा काढण्यासाठी ग्रामपंचायतीने घनकचरा व सांडपाणी व्यवस्थापन प्रकल्प उभारला आहे. तसेच ‘द कारर्गल’ ग्रंथाच्या आधारावर पाणी टंचाई मुक्त गाव करण्याच्या नाविन्यपूर्ण प्रकल्पाची सविस्तर माहिती उपसरपंच शंकरराव खेमनर यांनी जिल्हाधिकाऱ्यांना दिली. याच दौऱ्यादरम्यान डॉ. आशिया यांनी परिसरात असलेल्या बिबट्यांच्या परिस्थितीबाबतही सविस्तर चर्चा करून माहिती जाणून घेतली.

प्रशासकीय कामांचा आढावा घेताना जिल्हाधिकारी डॉ. पंकज आशिया यांनी थेट शेतकरी देऊबाई नामदेव कांबळे यांच्या शेतात जाऊन ई-पीक पाहणीची माहिती घेतली. यावेळी त्यांनी महसूल अधिकाऱ्यांना सूचना देऊन जागेवरच या शेतकऱ्याची पीक पाहणी पूर्ण करून घेतली. त्यानंतर साकूरमधील स्मशानभूमीच्या जागेची पाहणी करून त्याचा अधिकृत उतारा जिल्हाधिकाऱ्यांच्या हस्ते ग्रामपंचायतीकडे सुपूर्द करण्यात आला.

याप्रसंगी कृषी उत्पन्न बाजार समितीचे सभापती शंकरराव खेमनर, ज्येष्ठ नेते बाळासाहेब खेमनर, थोरात कारखान्याचे संचालक इंद्रजीत खेमनर, तहसीलदार धीरज मांजरे, भाजपचे तालुकाध्यक्ष गुलाबराजे भोसले, सरपंच सचिन सोनवणे, गटविकास अधिकारी प्रविण सिनारे, सहाय्यक गटविकास अधिकारी राजेंद्र ठाकूर, बालविकास प्रकल्प अधिकारी निलेश राऊत, विस्तार अधिकारी काशिनाथ सरोदे, कृषी विस्तार अधिकारी अजितदानंद पावसे, ग्रामविकास अधिकारी नागेश पाबळे, ग्राममहसूल अधिकारी सोमनाथ शेरमाळे, कैलास डोखे, रमेश पेंडभाजे, किशोर खेमनर, इसाक पटेल यांच्यासह ग्रामपंचायत सदस्य, कर्मचारी व ग्रामस्थ मोठ्या संख्येने उपस्थित होते.