संगमनेर, प्रतिनिधी –
संगमनेर शहर पोलीस ठाण्यात दाखल असलेल्या अमली पदार्थ व अंमली द्रव्य कायद्यांतर्गत (NDPS Act) गुन्ह्यातील फरार दोघा आरोपींना पकडण्यात पोलिसांना मोठे यश आले आहे. श्रीरामपूरच्या अपर पोलीस अधीक्षक कार्यालय आणि संगमनेरच्या उपविभागीय पोलीस अधिकारी कार्यालयाच्या संयुक्त पथकाने ही धडक कारवाई केली.
या घटनेची सविस्तर माहिती अशी की, संगमनेर विभागाचे उपविभागीय पोलीस अधिकारी कुणाल सोनवणे यांना दि. २१ जानेवारी २०२६ रोजी पहाटेच्या सुमारास एक गुप्त माहिती मिळाली होती. या माहितीनुसार, अमली पदार्थ विक्रीच्या गुन्ह्यातील फरार आरोपी साद शेख हा सध्या संगमनेर येथील भारतनगर भागात असल्याची खात्री झाली.
मिळालेल्या माहितीच्या आधारे पोलीस पथकाने तातडीने भारतनगर परिसरात सापळा रचला आणि मोहम्मद साद खालीद शेख (वय २४ वर्ष, रा. भारतनगर, संगमनेर) याला ताब्यात घेतले.
प्राथमिक चौकशीनंतर या गुन्ह्यातील इतर आरोपींचा शोध घेण्यासाठी पोलीस पथकाने नाशिक येथे धाड टाकली. तेथून रेहान शेरखान पठाण (वय १९ वर्ष, रा. वडाळा, नाशिक) या दुसऱ्या आरोपीलाही पोलिसांनी शिताफीने अटक केली.
या दोन्ही आरोपींविरुद्ध संगमनेर शहर पोलीस ठाण्यात गुन्हा रजि. नं. १०२७/२०२५ अन्वये अमली औषधद्रव्ये व मन:प्रभावी पदार्थ अधिनियम १९८५ च्या कलम ८ व २२ नुसार गुन्हा दाखल असून, पोलीस पुढील तपास करत आहेत.
ही कारवाई जिल्हा पोलीस अधीक्षक सोमनाथ घार्गे, अपर पोलीस अधीक्षक सोमनाथ वाघचौरे आणि उपविभागीय पोलीस अधिकारी कुणाल सोनवणे यांच्या मार्गदर्शनाखाली पार पडली. या पथकात अपर पोलीस अधीक्षक कार्यालयातील पोलीस कर्मचारी अशोक गाडे, राजेंद्र बिरदवडे, सहदेव चव्हाण तसेच पोलीस उपाधीक्षक कार्यालयातील बापूसाहेब हांडे, राहुल सारबंदे आणि सुनील ढाकणे यांचा समावेश होता. या कारवाईमुळे अमली पदार्थ तस्करी करणाऱ्यांच्या गोटात मोठी खळबळ उडाली असून, पोलीस उपनिरीक्षक संतोष पगारे या गुन्ह्याचा पुढील तपास करत आहेत.
पोलिसांची मोठी कारवाई; अमली पदार्थ तस्करीतील दोन फरार आरोपींच्या मुसक्या आवळल्या! संगमनेर पोलिसांची भारतनगर ते नाशिक ‘फिल्मी स्टाईल’ धाड, ड्रग्ज रॅकेटवर पोलिसांची वक्रदृष्टी
प्राथमिक चौकशीनंतर या गुन्ह्यातील इतर आरोपींचा शोध घेण्यासाठी पोलीस पथकाने नाशिक येथे धाड टाकली.
