विनापरवाना शस्त्र बाळगणाऱ्या तरुणावर पोलिसांची कारवाई; इंदिरानगर परिसरातून घातक शस्त्र जप्त

संगमनेर, प्रतिनिधी – 

शहरातील शांतता व सुव्यवस्थेला बाधा निर्माण होईल अशा पद्धतीने बेकायदेशीरपणे शस्त्रे बाळगणाऱ्या एका तरुणावर संगमनेर शहर पोलिसांनी कारवाई केली आहे. इंदिरानगर मैदान परिसरात शुक्रवारी रात्री उशिरा करण्यात आलेल्या या कारवाईत आरोपीकडून घातक शस्त्रे जप्त करण्यात आली असून, त्याच्यावर गुन्हा दाखल करण्यात आला आहे.

मिळालेल्या माहितीनुसार, संगमनेर शहर पोलीस स्टेशनचे पोलीस हवादार बाबासाहेब यशवंत सातपुते यांनी याप्रकरणी फिर्याद दिली आहे. शुक्रवारी (२३ जानेवारी) रात्री साधारण ११ वाजेच्या सुमारास संगमनेर येथील इंदिरानगर मैदानात आरोपी पप्पू ऊर्फ आकाश अर्जुन गोडगे हा संशयास्पदरित्या वावरताना आढळला.

पोलिसांनी त्याची झडती घेतली असता, त्याच्याकडे अंदाजे ५०० रुपये किमतीची ३ फूट लांबीची ॲल्युमिनियमची बेसबॉल स्टिक आणि १,००० रुपये किमतीचा ९ इंच लांबीचा लोखंडी बटनाचा चाकू मिळून आला.

जिल्हा दंडाधिकारी अहिल्यानगर यांनी १३ जानेवारी २०२६ रोजी जारी केलेल्या प्रतिबंधात्मक आदेशाचे उल्लंघन केल्याप्रकरणी ही कारवाई करण्यात आली आहे. सार्वजनिक क्षेत्रात शांतता व सुरक्षिततेचा भंग केल्याचा ठपका ठेवत आरोपीविरुद्ध महाराष्ट्र पोलीस अधिनियम १९५९ च्या कलम ३७(१)(अ) सह १३५ प्रमाणे गुन्हा रजिस्टर क्रमांक ८१/२०२६ नुसार नोंदवण्यात आला आहे.

सदर कारवाई संगमनेर पोलीस ठाण्याचे प्रभारी अधिकारी पोलीस निरीक्षक प्रवीण साळुंके आणि पोलीस उपनिरीक्षक बाळू घोडे यांच्या मार्गदर्शनाखाली करण्यात आली. या घटनेचा पुढील तपास पोलीस हेड कॉन्स्टेबल कानिफनाथ जाधव हे करत आहेत.