संगमनेर:
संगमनेर तालुका पोलीस ठाण्याच्या हद्दीत बेकायदा वाळू वाहतूक करणाऱ्या दोन डंपरवर स्थानिक गुन्हे शाखेने मोठी कारवाई केली आहे. ही घटना ८ फेब्रुवारी २०२६ रोजी मध्यरात्री साडेबारा वाजेच्या सुमारास डिग्रस ते ठाकरवाडी रोडवरील मेंगाळवस्ती येथे घडली. या कारवाईत दोन डंपर आणि वाळू असा एकूण २० लाख ४० हजार रुपये किमतीचा मुद्देमाल पोलिसांनी हस्तगत केला आहे.
अहिल्यानगरच्या स्थानिक गुन्हे शाखेचे पोलीस कॉन्स्टेबल योगेश जबाजी कर्डीले यांनी याप्रकरणी संगमनेर तालुका पोलीस ठाण्यात फिर्याद दिली आहे. केवळ संगमनेर शहरातच नव्हे तर संगमनेर तालुक्यात येथील यामुळे अवैध वाळू उपसा सुरू असल्याचे समोर आले आहे. गेल्या काही महिन्यांपासून संगमनेरला अवैध धंद्यांनी पोखरले आहे. यातून गुन्हेगारी देखील मोठ्या प्रमाणात वाढीस लागली आहे.
डिग्रस परिसरात अवैधरित्या वाळूची वाहतूक होणार असल्याची माहिती मिळाल्यानंतर पोलिसांनी सापळा रचला होता. मध्यरात्रीच्या सुमारास पोलिसांनी दोन संशयास्पद डंपर अडवले. यामध्ये प्रकाश भाऊसाहेब कोरडकर याच्या ताब्यातून ५ लाख रुपये किमतीचा टाटा ९०९ मॉडेलचा निळ्या रंगाचा डंपर (क्रमांक MH 12 EQ 6334) जप्त करण्यात आला. तसेच, फिरोज सुलतान शेख याच्या ताब्यातून १५ लाख रुपये किमतीचा टाटा ९१२ मॉडेलचा पिवळ्या रंगाचा विना क्रमांकाचा डंपर जप्त करण्यात आला.
या दोन्ही डंपरमध्ये प्रत्येकी दोन ब्रास याप्रमाणे एकूण चार ब्रास वाळू मिळून आली असून तिची किंमत ४० हजार रुपये इतकी आहे. आरोपींनी स्वतःच्या आर्थिक फायद्यासाठी शासनाचा कोणताही परवाना न घेता वाळूची चोरटी वाहतूक केल्याचे तपासात समोर आले आहे.
या प्रकरणी संगमनेर तालुका पोलीस ठाण्यात भारतीय न्याय संहिता कलम ३०३(२) नुसार गुन्हा दाखल करण्यात आला आहे. पोलीस निरीक्षक प्रविण साळुंखे यांच्या मार्गदर्शनाखाली पोलीस हेड कॉन्स्टेबल बडधे या गुन्ह्याचा पुढील तपास करत आहेत.
