एलसीबीच्या कारवाईत हॉटेल आणि कारमधून अवैध दारू जप्त; साडेपाच लाखाचा मुद्देमाल ताब्यात, एकावर गुन्हा दाखल

संगमनेर, प्रतिनिधी –

संगमनेर तालुक्यातील पिंपरणे शिवारात स्थानिक गुन्हे शाखेने मोठी कारवाई करत एका हॉटेलवर छापा टाकला. या कारवाईत हॉटेल आणि बाहेर उभ्या असलेल्या कारमधून देशी-विदेशी दारूचा मोठा साठा हस्तगत करण्यात आला असून, एकूण ५,४४,२४० रुपयांचा मुद्देमाल जप्त करण्यात आला आहे.

याप्रकरणी संगमनेर तालुका पोलीस ठाण्यात आरोपी साहेबराव भिकाजी राहिंज (वय ४६, रा. पिंपरणे) याच्यावर महाराष्ट्र दारूबंदी कायद्याच्या कलम ६५ (ई) नुसार गुन्हा दाखल करण्यात आला आहे. स्थानिक गुन्हे शाखेचे पोलीस कॉन्स्टेबल अमृत शिवाजी आढाव यांनी यासंदर्भात फिर्याद दिली आहे.

मिळालेल्या माहितीनुसार, शनिवारी ७ फेब्रुवारी रोजी सायंकाळी सव्वा चार वाजेच्या सुमारास पिंपरणे ते संगमनेर रोडवरील ‘हॉटेल गरीब’ येथे ही कारवाई करण्यात आली. पोलिसांनी हॉटेलची झडती घेतली असता तिथे देशी बॉबी संत्रा, मॅकडॉवेल नं. १, मुंबई माल्ट व्हिस्की, डीएसपी ब्लॅक आणि इम्पेरिअल ब्ल्यू अशा विविध कंपन्यांच्या सिलबंद बाटल्या आढळून आल्या. तसेच हॉटेलच्या बाहेर उभ्या असलेल्या स्विफ्ट डिझायर कारची (क्रमांक MH-02-BR-9629) झडती घेतली असता, त्यातही मोठ्या प्रमाणात देशी दारूच्या बाटल्या सापडल्या.

या छाप्यात पोलिसांनी २१,२०० रुपयांची विविध प्रकारची दारू आणि ५ लाख रुपये किमतीची कार असा एकूण ५ लाख ४४ हजार २४० रुपयांचा मुद्देमाल जप्त केला आहे. पोलीस हेडकॉन्स्टेबल जे. के. खेमनर या प्रकरणाचा पुढील तपास करत आहेत.