अहिल्यानगर –
अहिल्यानगर जिल्ह्याचा मोठा भौगोलिक विस्तार लक्षात घेऊन राज्य उत्पादन शुल्क विभागाने प्रशासकीय सोयीसाठी जिल्ह्याचे विभाजन केले आहे. आता जिल्ह्यासाठी अहिल्यानगर आणि शिर्डी अशी दोन स्वतंत्र अधीक्षक कार्यालये निर्माण करण्यात आली असून, शिर्डीच्या अधीक्षकपदी ऋषिकेश इंगळे यांची नियुक्ती करण्यात आली आहे.
या निर्णयामुळे प्रशासकीय कामकाजात सुसूत्रता येणार असून, राज्याला सर्वाधिक महसूल देणाऱ्या सहा प्रमुख जिल्ह्यांच्या यादीत असलेल्या अहिल्यानगरमध्ये आता दोन स्वतंत्र अधीक्षक कार्यरत असतील. नगर कार्यालयाची धुरा अधीक्षक सोनोणे यांच्याकडे कायम असून, शिर्डीसाठी स्वतंत्र प्रशासकीय यंत्रणा उभारणीला सुरुवात झाली आहे.
या नवीन रचनेनुसार तालुक्यांची विभागणी अत्यंत स्पष्टपणे करण्यात आली आहे. अहिल्यानगर कार्यालयांतर्गत अहिल्यानगर शहर, जामखेड, कर्जत, श्रीगोंदे, पारनेर, पाथर्डी आणि शेवगाव या सात तालुक्यांचा समावेश असेल. तर नवनियुक्त शिर्डी कार्यालयाकडे नेवासे, श्रीरामपूर, कोपरगाव, राहाता, राहुरी, संगमनेर आणि अकोले या उत्तर भागातील सात तालुक्यांची जबाबदारी सोपवण्यात आली आहे.
शिर्डी कार्यालयासाठी एकूण १७ पदे मंजूर करण्यात आली असून यामध्ये कार्यालय अध्यक्ष, लघुलेखक, लेखापाल, वरिष्ठ लिपिक, जवान आणि वाहनचालक अशा विविध संवर्गांचा समावेश आहे. विशेष म्हणजे शिर्डीसाठी स्वतंत्र भरारी पथकाचीही तरतूद करण्यात आली आहे.
सध्या शिर्डी कार्यालयासाठी पदे मंजूर झाली असली तरी प्रत्यक्षात पदभरती पूर्ण होईपर्यंत अहिल्यानगर कार्यालयातील उपअधीक्षक आणि निरीक्षकांकडे शिर्डीचा अतिरिक्त कार्यभार सोपवण्यात आला आहे. निरीक्षक आणि दुय्यम निरीक्षकांच्या कार्यक्षेत्राची पुनर्रचना करताना ती पोलीस ठाण्यांच्या हद्दीनुसार निश्चित करण्यात आली आहे, ज्यामुळे गुन्हे नियंत्रण आणि महसूल वसुलीत सुसूत्रता येईल.
जिल्ह्याच्या विभाजनाची चर्चा दीर्घकाळापासून सुरू असली, तरी महसूल, पोलीस आणि परिवहन विभागानंतर आता राज्य उत्पादन शुल्क विभागानेही शिर्डीत स्वतंत्र अस्तित्व निर्माण करून प्रशासकीय विकेंद्रीकरणाच्या दिशेने मोठे पाऊल टाकले आहे.
