संगमनेर, प्रतिनिधी –
मालेगाव येथील उपमहापौरांच्या दालनात टिपू सुलतानचा फोटो लावल्याच्या घटनेचे समर्थन करताना काँग्रेस प्रदेशाध्यक्ष हर्षवर्धन सपकाळ यांनी टिपू सुलतानची तुलना थेट छत्रपती शिवाजी महाराज यांच्याशी केल्याने महाराष्ट्रात संतापाची लाट उसळली आहे. या विधानाचा निषेध करण्यासाठी संगमनेर बसस्थानक परिसरात शिवसेना-भाजप महायुतीच्यावतीने मंगळवारी जोरदार निदर्शने करण्यात आली.
छत्रपती शिवाजी महाराज हे हिंदवी स्वराज्याचे संस्थापक आणि महाराष्ट्राचे आराध्य दैवत आहेत. त्यांच्या अतुलनीय पराक्रमाची आणि जाज्वल्य इतिहासाची तुलना कोणाशीही होऊ शकत नाही, अशी भावना आंदोलकांनी यावेळी व्यक्त केली. सपकाळ यांनी केलेले विधान हे महाराष्ट्राच्या अस्मितेचा अपमान करणारे असून, यामुळे प्रत्येक शिवप्रेमीच्या भावना दुखावल्या गेल्याचे आंदोलकांचे म्हणणे आहे. मालेगावमधील फोटो प्रकरणाने आधीच चीड निर्माण झालेली असताना, जबाबदार पदावर असलेल्या व्यक्तीने असे विधान करणे अत्यंत निषेधार्ह असल्याचे यावेळी सांगण्यात आले.
नीलम खताळ, नगरसेविका साक्षी सूर्यवंशी, शिवसेना शहरप्रमुख विनोद सूर्यवंशी, भाजप शहराध्यक्ष पायल ताजणे, आरपीआयचे शहराध्यक्ष कैलास कासार यांच्यासह महायुतीचे पदाधिकारी कार्यकर्ते, नागरिकांनी उपस्थित राहून घोषणाबाजी करत आपला निषेध नोंदवला. या आंदोलनात शिवसेना आणि भाजप महायुतीचे अनेक पदाधिकारी व कार्यकर्ते मोठ्या संख्येने सहभागी झाले होते.📌
मालेगाव येथील उपमहापौराच्या दालनात टिपू सुलतानचा फोटो लावण्यात आल्याची घटना अत्यंत निषेधार्ह आणि महाराष्ट्रातील प्रत्येक नागरिकाच्या मनात चीड आणून देणारी आहे. काँग्रेस प्रदेशाध्यक्ष हर्षवर्धन सपकाळ यांनी या कृत्याचे समर्थन करत टिपू सुलतानची तुलना थेट छत्रपती शिवाजी महाराज यांच्याशी केली, ही महाराष्ट्राच्या अस्मितेला ठेच देणारी बाब आहे. – अमोल खताळ, आमदार.
