अकोले परिसरात अवैध दारू वाहतूक करणारी स्विफ्ट कार जप्त; सुमारे पाच लाखाचा मुद्देमाल जप्त, श्रीरामपूर अपर पोलीस अधीक्षकांच्या पथकाची मोठी कारवाई

अकोले:

अहमदनगर जिल्ह्यातील अकोले पोलीस स्टेशनच्या हद्दीत अवैध रित्या देशी दारूची वाहतूक करणाऱ्या एका स्विफ्ट डिझायर कारवर श्रीरामपूर अपर पोलीस अधीक्षक कार्यालयाच्या पथकाने यशस्वी कारवाई केली आहे. या कारवाईत पोलिसांनी एकूण ४ लाख ८१ हजार १५० रुपये किमतीचा मुद्देमाल जप्त केला असून तीन जणांविरुद्ध गुन्हा दाखल करण्यात आला आहे.

मिळालेल्या माहितीनुसार, सोमवारी (१६ फेब्रुवारी) श्रीरामपूरचे अपर पोलीस अधीक्षक सोमनाथ वाघचौरे यांनी त्यांच्या कार्यालयातील पथकाला अकोले पोलीस स्टेशन हद्दीत अवैध धंद्यांवर कारवाई करण्याचे आदेश दिले होते. त्यानुसार पोलीस हेड कॉन्स्टेबल दादासाहेब लोढे, पोलीस नाईक संदीप दरंदले, पोलीस कॉन्स्टेबल अशोक गाढे आणि राजेंद्र बिरदवडे हे पथक गस्त घालत होते. यावेळी धामणगाव पाट ते कोतूळ जाणारे रोडने एका स्विफ्ट डिझायर कारमधून (क्र. एम.एच.०५ बी एक्स ५६३५) दारूची वाहतूक होणार असल्याची खात्रीशीर बातमी पोलीस हेड कॉन्स्टेबल दादासाहेब लोढे यांना मिळाली.

या माहितीनंतर पोलिसांनी तातडीने हालचाली करत कोतूळ क्षेत्रातील पोलीस कॉन्स्टेबल अनिल जाधव आणि महेंद्र गुंजाळ यांना सोबत घेत दोन पंचांसह हायटेक नर्सरी जवळ सापळा रचला असता सकाळी साडेदहा वाजण्याच्या सुमारास संबंधित कार येताना दिसली. पोलिसांनी गाडी थांबवून चौकशी केली असता त्यामध्ये दोन व्यक्ती बसलेल्या आढळल्या. गाडीची झडती घेतली असता ६१ हजार १५० रुपये किमतीच्या देशी दारूच्या ९२४ बाटल्या मिळून आल्या.

या प्रकरणी पोलिसांनी गाडी चालक अक्षय मारुती वाकचौरे (वय २६, रा. परखतपूर, ता. अकोले) आणि त्याच्यासोबत असलेला राजेंद्र बाळासाहेब तांबे (वय ३०, रा. पेमगिरी, ता. संगमनेर) यांना ताब्यात घेतले. आरोपींकडे चौकशी केली असता त्यांनी ही दारू अभिजित रणशूर (रा. संगमनेर) याच्याकडून खरेदी केल्याचे सांगितले. या कारवाईत दारू साठा, स्विफ्ट डिझायर गाडी आणि दोन मोबाईल असा एकूण ४ लाख ८१ हजार १५० रुपयांचा मुद्देमाल जप्त करण्यात आला आहे.

सध्या अक्षय वाकचौरे, राजेंद्र तांबे आणि फरार असलेला अभिजित रणशूर यांच्या विरुद्ध अकोले पोलीस स्टेशनमध्ये महाराष्ट्र दारूबंदी कायद्याच्या विविध कलमान्वये गुन्हा दाखल करण्यात आला आहे. ही कारवाई पोलीस अधीक्षक सोमनाथ घार्गे, अपर पोलीस अधीक्षक सोमनाथ वाघचौरे, उपविभागीय पोलीस अधिकारी कुणाल सोनवणे आणि अकोलेचे पोलीस निरीक्षक मोहन बोरसे यांच्या मार्गदर्शनाखालील पथकाने केली. या गुन्ह्याचा पुढील तपास अकोले पोलीस करत आहेत.