महिला शिक्षिकेचा विनयभंग करणाऱ्या सहकारी शिक्षकाला तीन वर्षे सक्तमजुरी; संगमनेर न्यायालयाचा ऐतिहासिक निकाल

संगमनेर, प्रतिनिधी – 

शाळेसारख्या पवित्र ठिकाणी सहकारी महिला शिक्षिकेचा विनयभंग करून तिला अमानुषपणे मारहाण करणाऱ्या शिक्षकाला संगमनेर न्यायालयाने कडक शिक्षा सुनावली आहे. संगमनेर येथील श्रमशक्ती माध्यमिक विद्यालयातील ही धक्कादायक घटना असून, आरोपी शिक्षक दत्तु किसन कौटे याला अतिरिक्त मुख्य न्यायदंडाधिकारी पी. बी. जोशी यांनी दोषी ठरवत तीन वर्षे सक्तमजुरी आणि १० हजार रुपये दंडाची शिक्षा ठोठावली आहे. या निकालामुळे शैक्षणिक क्षेत्रात मोठी खळबळ उडाली आहे.

फेब्रुवारी २०२५ मध्ये पीडित शिक्षिकेने आपल्या पतीच्या वाढदिवसानिमित्त मिळालेला पुष्पगुच्छ शाळेत आणला होता, तो विद्यार्थ्यांनी दहावीच्या निरोप समारंभात मुख्याध्यापकांना भेट म्हणून दिला. या साध्या कारणावरून आरोपी दत्तु कौटे याने पीडितेशी वाद उकरून काढला होता. १३ फेब्रुवारी २०२५ रोजी स्टाफ रूममध्ये पीडितेचा उपरोधिक भाषेत अपमान केल्यानंतर, दुसऱ्या दिवशी म्हणजेच १४ फेब्रुवारी रोजी आरोपीने क्रूरतेची सीमा ओलांडली. सकाळी ८:२० वाजता पीडित शिक्षिका शाळेच्या रंगमंचावर बसलेली असताना आरोपीने तिथे येऊन भर विद्यार्थ्यांसमोर तू किती नालायक आहेस हे मला माहीत आहे अशा शब्दांत तिचा अपमान केला. केवळ शाब्दिक चकमकीवर न थांबता, आरोपीने पीडितेचा हात धरून तिचा विनयभंग केला आणि तिच्या गालावर जोरात चापट मारली. या हल्ल्यामुळे पीडित शिक्षिका जागीच बेशुद्ध होऊन खाली पडली होती.

याप्रकरणी पीडित महिलेच्या तक्रारीवरून संगमनेर तालुका पोलीस ठाण्यात गुन्हा दाखल करण्यात आला होता. पोलीस कॉन्स्टेबल संपत जायभाय यांनी या गंभीर प्रकरणाचा तपास करत संगमनेर न्यायालयात आरोपी विरोधात आरोप पत्र दाखल केले होते. अतिरिक्त मुख्य न्यायदंडाधिकारी पी. बी. जोशी यांच्यासमोर या खटल्याचे कामकाज सुरू होते. न्यायालयात सहाय्यक सरकारी अभियोक्ता श्रीमती पायल बी. एखंडे यांनी प्रभावीपणे बाजू मांडली. त्यांनी पीडित महिला आणि तिच्या पतीसह एकूण सात साक्षीदारांच्या साक्षी नोंदवल्या. आरोपीने बचावासाठी केलेले सर्व दावे फेटाळून लावत न्यायालयाने पीडितेची साक्ष विश्वसनीय मानली. एका महिला शिक्षिकेच्या बाबतीत घडलेली ही घटना समाजासाठी घातक असल्याचे निरीक्षण न्यायालयाने नोंदवले.

या खटल्याचा निकाल देताना न्यायाधीशांनी भारतीय न्याय संहिता २०२३ च्या कलम ७४, ११५(२) आणि ३५२ अन्वये आरोपीला दोषी धरले. न्यायालयाने आरोपी दत्तु कौटे याला तीन वर्षांचा सक्तमजुरीचा कारावास आणि १० हजार रुपये दंड अशी शिक्षा सुनावली. विशेष म्हणजे, दंडाची ही १० हजार रुपयांची रक्कम पीडित शिक्षिकेला नुकसान भरपाई म्हणून देण्याचे आदेशही न्यायालयाने दिले आहेत.