नाशिक-पुणे महामार्गावर दरोड्याचा कट उधळला; पोलिसांकडून केरळच्या टोळीला अटक

सिन्नर:
नाशिक-पुणे महामार्गावरील मनेगाव शिवारामध्ये दरोडा टाकण्याच्या तयारीत असलेल्या एका आंतरराज्य टोळीचा सिन्नर पोलिसांनी पर्दाफाश केला आहे. मंगळवारी (१७ फेब्रुवारी) मध्यरात्री करण्यात आलेल्या या धाडसी कारवाईत केरळ राज्यातील दहा संशयितांना ताब्यात घेण्यात आले असून त्यांच्याकडून मोठ्या प्रमाणावर शस्त्रास्त्रे जप्त करण्यात आली आहेत. या कारवाईमुळे महामार्गावर सक्रिय असलेल्या एका मोठ्या गुन्हेगारी टोळीचे धाबे दणाणले आहेत.
पोलिसांना मंगळवारी रात्री अकराच्या सुमारास मनेगाव शिवारातील ‘सिन्नर गेस्ट हाऊस’ या हॉटेलमध्ये काही संशयास्पद हालचाली होत असल्याची माहिती मिळाली होती. या माहितीचे गांभीर्य ओळखून पोलीस निरीक्षक हेमंतकुमार भामरे यांच्या नेतृत्वाखाली हवालदार समाधान बोराडे, नितीन डावखर, कृष्णा कोकाटे आणि गुन्हे अन्वेषण विभागाच्या पथकाने हॉटेलवर छापा टाकला.
पोलिसांनी अत्यंत सावधगिरीने परिसराची पाहणी केली असता, हॉटेलबाहेर उभ्या असलेल्या वाहनांमध्ये तीन संशयित बसलेले आढळले. पोलिसांनी सर्वप्रथम या तिघांना ताब्यात घेतले आणि त्यानंतर हॉटेलमधील खोलीकडे आपला मोर्चा वळवला.
पोलिसांची चाहूल लागताच हॉटेलच्या खोलीत असलेल्या सात जणांमध्ये एकच खळबळ उडाली. अटकेच्या भीतीने दोन संशयितांनी गच्चीच्या दिशेने धाव घेत पळण्याचा प्रयत्न केला. मात्र, पोलिसांनी पाठलाग करून त्यातील एकाला पकडण्यात यश मिळवले, तर दुसरा संशयित अंधाराचा फायदा घेऊन पसार झाला. उर्वरित सहा जणांना हॉटेलच्या खोलीतूनच पोलिसांनी बेड्या ठोकल्या. या संपूर्ण कारवाईत एकूण अकरापैकी दहा संशयित पोलिसांच्या जाळ्यात अडकले असून एका फरार आरोपीचा शोध पोलीस युद्धपातळीवर घेत आहेत.
या घटनेची माहिती मिळताच पोलीस उपअधीक्षक के. के. पाटील यांनी सिन्नर पोलीस ठाण्यात धाव घेत तपासाची चक्रे फिरवली. पकडण्यात आलेले सर्व आरोपी केरळ राज्यातील असून, त्यांच्याकडे असलेली शस्त्रास्त्रे आणि वाहने पोलिसांनी जप्त केली आहेत.
ही टोळी नाशिक जिल्ह्यात कोणत्या मोठ्या दरोड्याच्या उद्देशाने आली होती, तसेच त्यांचे स्थानिक कनेक्शन काय आहे, याबाबतची कसून चौकशी रात्री उशिरापर्यंत सुरू होती. या प्रकरणी सिन्नर पोलीस ठाण्यात गुन्हा दाखल करण्यात आला असून फरार आरोपीच्या अटकेसाठी पथके रवाना करण्यात आली आहेत.