अहिल्यानगरमध्ये खळबळ: माजी महापौर अभिषेक कळमकराविरोधात बलात्काराचा गुन्हा दाखल

अहिल्यानगर:

राष्ट्रवादी काँग्रेस पार्टी (शरदचंद्र पवार) पक्षाचे शहराध्यक्ष तथा माजी महापौर अभिषेक कळमकर यांच्याविरोधात बलात्काराचा गुन्हा दाखल झाल्याने शहरात मोठी खळबळ उडाली आहे.

शाळेत नोकरी लावून देण्याचे आमिष दाखवून एका युवतीवर वारंवार अत्याचार केल्याचा गंभीर आरोप त्यांच्यावर करण्यात आला आहे. या प्रकरणी पीडित युवतीने दिलेल्या तक्रारीवरून एमआयडीसी पोलिसांनी गुन्ह्याची नोंद केली असून सध्या अभिषेक कळमकर फरार असल्याचे समजते.

फिर्यादीनुसार, शिरूर तालुक्यातील पीडित युवती तीन महिन्यांपूर्वी नोकरीच्या शोधात असताना तिने सोशल मीडियाच्या माध्यमातून अभिषेक कळमकर यांच्याशी संपर्क साधला होता. नोकरीची गरज असल्याचे सांगितल्यानंतर कळमकर यांनी तिला कागदपत्रांसह भेटीसाठी बोलावले. एमआयडीसी परिसरातील स्वतःच्या शाळेत कामाला लावून देतो असे सांगून त्यांनी पीडितेचा विश्वास संपादन केला. त्यानंतर शाळा दाखवण्याच्या बहाण्याने तिला विळद घाट परिसरात नेले आणि तिथे शीतपेयातून गुंगीचे औषध देऊन तिच्यावर गाडीतच अत्याचार केल्याचे पीडितेने तक्रारीत नमूद केले आहे.

या घटनेनंतर कळमकर यांनी पीडितेला व्हिडिओ कॉल करून आणि धमकावून तिचा छळ सुरूच ठेवला. १८ फेब्रुवारी रोजी शिरूर येथील एका हॉटेलमध्ये कागदपत्रे घेण्याच्या बहाण्याने बोलावून तिथेही तिच्यावर जबरदस्तीने शरीरसंबंध प्रस्थापित केले व त्याचे चित्रीकरण केले.

या कृत्याबाबत कोणाला सांगितल्यास पीडितेसह तिच्या मुलीला जीवे मारण्याची धमकी देण्यात आली होती. सततच्या त्रासाला कंटाळून अखेर पीडितेने एमआयडीसी पोलीस ठाण्यात धाव घेऊन तक्रार दाखल केली. या घटनेमुळे राजकीय वर्तुळात मोठी चर्चा सुरू आहेत.