संगमनेर, प्रतिनिधी –
दैनंदिन जीवनातील धावपळ विसरून नागरिकांनी आनंदाचे क्षण अनुभवावेत यासाठी रोटरी क्लब ऑफ संगमनेरच्यावतीने अत्यंत लोकप्रिय असलेल्या ‘आनंदी रस्ते’ अर्थात ‘हॅपी स्ट्रीट’ या उपक्रमाचे आयोजन करण्यात आले आहे. लहान मुलांपासून ज्येष्ठांपर्यंत सर्वांना एकत्र आणणारा हा उपक्रम शहरात सकारात्मक ऊर्जा निर्माण करणारा ठरेल, असा विश्वास आयोजकांनी व्यक्त केला आहे.
यंदा या उपक्रमाचे विशेष महत्त्व असून, हे या उपक्रमाचे १० वे वर्ष आहे. हा उपक्रम उद्या रविवारी (२२ फेब्रुवारी) सकाळी ७ ते १० या वेळेत स्व. ओंकारनाथ मालपाणी मार्गावर, राजपाल क्लॉथ स्टोअर ते जाणता राजा मैदान या दरम्यान पार पडणार आहे.
या उपक्रमाच्या माध्यमातून नागरिकांना विविध खेळ, गाणी, गप्पा आणि झुंबा डान्सच्या तालावर विरंगुळा मिळवता येणार आहे. रस्ते आकर्षक चित्रांनी सजवले जाणार असून, रंगकाम केलेली झाडे आणि फुग्यांच्या सजावटीमुळे परिसरात उत्साहाचे वातावरण असेल. कार्यक्रमात ऑर्केस्ट्रा, वासुदेव, नृत्य, लेझीम, मल्लखांब, व्यंगचित्रे, आकर्षक निवेदन आणि बहारदार झुंबा डान्स अशा विविध सांस्कृतिक कार्यक्रमांची मेजवानी संगमनेरकरांना मिळणार आहे.
याशिवाय सहभागी नागरिकांनी लिंगोरचा, दोरी-उड्या, क्रिकेट, व्हॉलीबॉल, गोट्या, टायर-चकरी, फ्लाइंग डिश यांसारखे पारंपरिक खेळ किंवा मिमिक्री, जोक्स आणि विडंबन गीतांचे सादरीकरण करण्यासाठी स्वतःचे साहित्य सोबत आणल्यास त्यांचे विशेष स्वागत केले जाणार आहे.
नागरिकांमध्ये सामाजिक एकोपा वाढवणे, कुटुंबासोबत वेळ घालवणे आणि पारंपारिक कलांना प्रोत्साहन देणे हा या उपक्रमाचा मुख्य हेतू असल्याचे आयोजकांनी नमूद केले आहे. रोटरी क्लब ऑफ संगमनेरचे अध्यक्ष रो. विश्वनाथ मालाणी आणि सेक्रेटरी सौरभ म्हाळस यांनी सर्व नागरिकांना सहकुटुंब उपस्थित राहण्याचे आवाहन केले आहे. या उपक्रमाच्या यशस्वीतेसाठी प्रकल्प प्रमुख रोटेरियन संकेत काजळे यांच्यासह धीरज देशमुख, महेश वाकचौरे आणि समीर शहा हे परिश्रम घेत आहेत.
या भव्य उपक्रमाच्या प्रकल्प समितीमध्ये दिलीप मालपाणी, दीपक मणियार, अजित काकडे, ओंकार सोमाणी, नरेंद्र चांडक, ऋषिकेश मोंढे, आनंद हासे, अमित पवार, मधुसूदन करवा, सोनू राजपाल, किशोर पोखरकर, राजेंद्र खोसे, विकास लावरे, डॉ. मनोहर सचदेव, डॉ. विनायक नागरे आणि संदीप फटांगरे अशा सर्व सदस्यांचा सक्रिय सहभाग आहे.
