संगमनेर, प्रतिनिधी –
सहकारी क्षेत्रातील अग्रगण्य आणि आदर्श संस्था म्हणून ओळखल्या जाणाऱ्या सहकारमहर्षी भाऊसाहेब थोरात सहकारी साखर कारखान्याच्या सन २०२५-२६ या गळीत हंगामाचा सांगता समारंभ बुधवारी (२५ फेब्रुवारी) होणार आहे.
सकाळी ९ वाजता आयोजित या सोहळ्याला काँग्रेसचे ज्येष्ठ नेते तथा माजी महसूलमंत्री बाळासाहेब थोरात आणि माजी आमदार डॉ. सुधीर तांबे, आमदार सत्यजित तांबे यांची प्रमुख उपस्थिती राहणार असल्याची माहिती कारखान्याचे व्हाईस चेअरमन पांडुरंग पाटील घुले यांनी दिली आहे.
स्वातंत्र्यसेनानी सहकारमहर्षी भाऊसाहेब थोरात यांच्या विचारांचा वारसा जपत या कारखान्याने प्रतिकूल परिस्थितीतही ऊस उत्पादक शेतकऱ्यांना सातत्याने दिलासा दिला आहे. यंदाच्या हंगामातही कमी पर्जन्यमान आणि ऊस टंचाईचे आव्हान असताना, कारखान्याने यशस्वीरित्या गाळप पूर्ण केले आहे. या सांगता सोहळ्याचे मुख्य पूजन बाळासाहेब थोरात व त्यांच्या सुविद्य पत्नी कांचनताई थोरात यांच्या हस्ते होणार आहे.
याप्रसंगी नगराध्यक्ष दुर्गाताई तांबे, ॲड. माधवराव कानवडे, बाजीराव खेमनर, रणजीतसिंह देशमुख, नगराध्यक्षा डॉ. मैथिलीताई तांबे, कॅन्सरतज्ञ डॉ. जयश्रीताई थोरात यांच्यासह जिल्ह्यातील विविध सहकारी संस्थांचे पदाधिकारी, नगरसेवक आणि राजकीय क्षेत्रातील मान्यवर मोठ्या संख्येने उपस्थित राहणार आहेत.
कारखान्याचे सर्व संचालक मंडळ आणि कार्यकारी संचालक जगन्नाथ घुगरकर यांनी या समारंभासाठी सर्व सभासद, ऊस उत्पादक शेतकरी आणि हितचिंतकांनी मोठ्या संख्येने उपस्थित राहावे, असे आवाहन केले आहे.
