महिलांच्या कर्तृत्वाला एकविरा फाउंडेशनचे मोठे व्यासपीठ: थोरात ४४२५ खेळाडूंच्या सहभागाने क्रीडा महोत्सवाचा दिमाखदार शुभारंभ

संगमनेर, प्रतिनिधी-
कुटुंब, समाज आणि देशाच्या विकासामध्ये महिलांचे योगदान अत्यंत मोलाचे आहे. आज प्रत्येक क्षेत्रात महिलांनी आपले स्वतंत्र स्थान निर्माण केले असून, त्यांचे हे यश नव्या पिढीसाठी नक्कीच प्रेरणादायी आहे. जागतिक महिला दिनाचे औचित्य साधून एकविरा फाउंडेशनच्या वतीने आयोजित या क्रीडा स्पर्धा केवळ खेळ नसून महिलांसाठी एक मोठे व्यासपीठ आहे. या स्पर्धांमधून मिळणारा आनंद आणि ऊर्जा महिलांना वर्षभराच्या कामासाठी नवी उभारी देईल, असे प्रतिपादन काँग्रेसच्या राष्ट्रीय कार्य समितीचे सदस्य व माजी महसूल मंत्री बाळासाहेब थोरात यांनी केले.
सहकार महर्षी भाऊसाहेब थोरात क्रीडा संकुल येथे आयोजित ‘महिला क्रीडा महोत्सव २०२६’ च्या शानदार उद्घाटन प्रसंगी ते बोलत होते. यावेळी व्यासपीठावर माजी आमदार डॉ. सुधीर तांबे, नगराध्यक्ष डॉ. मैथिलीताई तांबे, एकविरा फाउंडेशनच्या अध्यक्षा डॉ. जयश्रीताई थोरात, माजी नगराध्यक्ष दुर्गाताई तांबे यांच्यासह विविध क्षेत्रांतील मान्यवर महिला पदाधिकारी मोठ्या संख्येने उपस्थित होत्या.
भाषणात बाळासाहेब थोरात यांनी राजमाता जिजाऊ, सावित्रीबाई फुले आणि इंदिरा गांधी यांच्या कर्तृत्वाचा वारसा सांगत, संगमनेरमधील मुलींच्या प्रगतीचे कौतुक केले. अभ्यासासोबतच शारीरिक सुदृढतेसाठी खेळाचे महत्त्व ओळखून महिलांनी या स्पर्धांचा मनसोक्त आनंद घ्यावा, असे आवाहन त्यांनी केले. डॉ. सुधीर तांबे यांनीही उत्तम आहार आणि व्यायामाचे महत्त्व अधोरेखित करत, डॉ. जयश्रीताई थोरात यांच्या पुढाकाराने सुरू असलेल्या या उपक्रमाचे स्वागत केले.
एकविरा फाउंडेशनच्या अध्यक्ष डॉ. जयश्रीताई थोरात यांनी यावेळी महिला सबलीकरणाचा संकल्प व्यक्त केला. त्या म्हणाल्या की, संगमनेरच्या मुलींनी पोलीस दल, क्रिकेट आणि सनदी लेखापाल अशा विविध कठीण क्षेत्रांत नाव कमावले आहे. त्यांचा हा गौरव करण्यासाठी आणि इतर खेळाडूंना संधी देण्यासाठी एकविरा सातत्याने प्रयत्नशील आहे. यंदा पाच दिवस चालणाऱ्या या महोत्सवात महिलांचा सहभाग विक्रमी असून, सर्वांनी ‘स्वस्थ रहा, मस्त रहा आणि जबरदस्त रहा’ असा मंत्र त्यांनी दिला.
या सोहळ्यात विविध क्षेत्रांत उल्लेखनीय कामगिरी करणाऱ्या २२ गुणवंत महिलांचा सन्मानचिन्ह देऊन गौरव करण्यात आला. यामध्ये आयपीएल खेळाडू माया सोनवणे, सीए निशिगंधा कानवडे, पोलीस प्रतीक्षा चाचण आणि बीएसएफमध्ये निवड झालेली अश्विनी रोडे यांचा समावेश होता.
यावर्षीच्या क्रीडा महोत्सवाचे मुख्य आकर्षण म्हणजे क्रिकेटमधील १६१ संघ आणि रस्सीखेचमधील १६० संघांचा सहभाग आहे. एकूण ४४२५ महिला खेळाडूंमध्ये ६८ वर्षीय आजींचाही उत्साह दिसून येत आहे. मैदानावर थेट प्रक्षेपण, खेळाडूंना दिलेले विशेष गणवेश आणि प्रेक्षकांची गर्दी यामुळे हा सोहळा अत्यंत रोमांचकारी ठरत आहे. या क्रीडा कुंभाचा जास्तीत जास्त नागरिकांनी लाभ घ्यावा, असे आवाहन आयोजकांच्या वतीने करण्यात आले आहे.