पोलिसांच्या सतर्कतेमुळे ‘ग्रो-इन्व्हेस्टर’ कंपनीचा पर्दाफाश; गुंतवणुकदारांचे १ कोटींहून अधिक रुपये परत

श्रीरामपूर, विशेष प्रतिनिधी –
अल्पवधीत अवाढव्य परताव्याचे आमिष दाखवून सामान्य जनतेची फसवणूक करणाऱ्या ‘ग्रो-इन्व्हेस्टर’ कंपनीवर श्रीरामपूर पोलिसांनी धडक कारवाई केली आहे. अपर पोलीस अधीक्षक सोमनाथ वाघचौरे यांना मिळालेल्या गोपनीय माहितीनुसार, भोकर परिसरात बेकायदेशीरपणे गुंतवणूक स्वीकारून लोकांची लूट केली जात होती. या माहितीची गांभीर्याने दखल घेत पोलिसांनी कोणतीही अधिकृत तक्रार येण्याची वाट न पाहता स्वतःहून पुढाकार घेऊन हा घोटाळा उघडकीस आणला आहे.
या कारवाईसाठी पोलीस पथकाने २६ डिसेंबर २०२५ रोजी भोकर शिवारातील संदिपराज मोहिणीबाई कपाटे (वय ३६) याच्या घरावर छापा टाकला. यावेळी पोलिसांनी संशयिताकडून कोणतीही अधिकृत परवानगी नसल्याचे निष्पन्न केले. झडतीदरम्यान ९ पासबुक, १० चेकबुक, हिशोबाची वही, लॅपटॉप, संगणक, रोख रक्कम आणि इतर इलेक्ट्रॉनिक साहित्य जप्त करण्यात आले आहे. याप्रकरणी श्रीरामपूर तालुका पोलीस स्टेशनमध्ये गुन्हा दाखल करण्यात आला असून पोलीस निरीक्षक अरुण धनवडे यांनी स्वतः फिर्याद दिली आहे.
पोलिसांच्या या धाडसी कारवाईमुळे आरोपीने अटकेच्या भीतीने आतापर्यंत अनेक ठेवीदारांना १ कोटी रुपयांपेक्षा जास्त रक्कम परत केली आहे. अद्यापही काही गुंतवणूकदारांचे पैसे परत देण्याची प्रक्रिया सुरू असून, ज्या नागरिकांना त्यांचे पैसे मिळालेले नाहीत त्यांनी तातडीने श्रीरामपूर तालुका पोलीस स्टेशनशी संपर्क साधण्याचे आवाहन पोलिसांनी केले आहे.
ही संपूर्ण कारवाई पोलीस अधीक्षक सोमनाथ घार्गे आणि अपर पोलीस अधीक्षक सोमनाथ वाघचौरे यांच्या मार्गदर्शनाखाली पथकाने यशस्वी केली असून, नागरिकांनी अशा कोणत्याही भूलथापांना बळी पडू नये, असे आवाहन प्रशासनाकडून करण्यात आले आहे.