स्वातंत्र्यसेनानी भाऊसाहेब थोरात हे समाजविकासाचे कृतिशील संत – मल्हार अरणकल्ले

संगमनेर, प्रतिनिधी –
स्वातंत्र्यसंग्रामात वयाच्या अवघ्या १९ व्या वर्षी उडी घेणारे आणि आयुष्यभर शब्दांचा पक्केपणा व मनाचा सच्चेपणा जपणारे स्वातंत्र्यसेनानी भाऊसाहेब थोरात हे समाज विकासासाठी झटणारे एक ‘कृतीशील संत’ होते, असे गौरवपूर्ण उद्गार ज्येष्ठ साहित्यिक मल्हार अरणकल्ले यांनी काढले.
अमृत उद्योग समूहाच्या वतीने सहकारमहर्षी भाऊसाहेब थोरात यांच्या १६ व्या पुण्यस्मरण दिनानिमित्त कारखाना कार्यस्थळावरील प्रेरणास्थळ येथे आयोजित अभिवादन सभेत ते मुख्य मार्गदर्शक म्हणून बोलत होते. याप्रसंगी माजी आमदार डॉ. सुधीर तांबे, आमदार सत्यजित तांबे, थोरात कारखान्याचे व्हाईस चेअरमन पांडुरंग घुले, माजी नगराध्यक्ष दुर्गाताई तांबे, डॉ. जयश्रीताई थोरात, अमेय प्रकाशाचे उल्हास लाटकर यांच्यासह अमृत उद्योग समूहातील विविध संस्थांचे पदाधिकारी आणि कार्यकर्ते मोठ्या संख्येने उपस्थित होते.
मल्हार अरणकल्ले म्हणाले की, डॉ. अण्णासाहेब शिंदे यांच्या संस्कारातून घडलेल्या भाऊसाहेबांनी स्वातंत्र्यप्राप्तीनंतर सहकार, शेती, शिक्षण आणि दूध व्यवसायाच्या माध्यमातून संगमनेर तालुक्याला समृद्ध केले. स्वार्थापेक्षा जनहिताला प्राधान्य देत त्यांनी स्वतःच्या सरकारविरोधातही मोर्चे काढले. विशेषतः वयाच्या ८४ व्या वर्षी त्यांनी सुरू केलेले ‘दंडकारण्य अभियान’ ही पर्यावरण संवर्धनाची एक मोठी लोकचळवळ ठरली आहे.
सध्याच्या काळात एकमेकांचे पाय ओढण्याची वृत्ती वाढत असताना, सर्वांना सोबत घेऊन जाण्याचा भाऊसाहेबांचा सहकार विचार तरुणांसाठी प्रेरणादायी आहे. लोकनेते बाळासाहेब थोरात यांनी हाच नैतिकतेचा आणि लोककल्याणाचा वारसा समर्थपणे पुढे चालवला असून, आज महाराष्ट्राला अशा खंबीर नेतृत्वाची गरज असल्याचेही अरणकल्ले यांनी नमूद केले.
माजी आमदार डॉ. सुधीर तांबे यांनी सांगितले की, भाऊसाहेबांच्या दूरदृष्टीमुळेच हा तालुका दुष्काळी भागातून विकसित तालुका म्हणून नावारूपास आला. त्यांच्या कार्याचा पाया नैतिकता हा होता. ‘राजहंस’ सारखा विश्वासाचा ब्रँड आणि ‘एसएमबीटी’ सारखे सेवाभावी रुग्णालय ही त्यांच्याच मोठ्या स्वप्नांची फलश्रुती आहे, याचा लाभ आज हजारो सामान्य नागरिकांना मिळत आहे.
कार्यक्रमाच्या पूर्वसंध्येला नूतन ऑडिटोरियम हॉलमध्ये प्रा. विनोद राऊत व त्यांच्या सहकाऱ्यांनी सादर केलेल्या ‘भजन संध्या’ कार्यक्रमाने संपूर्ण वातावरण भक्तीमय झाले होते. संत चोखामेळा, संत तुकाराम आणि संत ज्ञानेश्वरांच्या अभंगांनी उपस्थितांना मंत्रमुग्ध केले. या कार्यक्रमाचे आभार प्रदर्शन पांडुरंग घुले यांनी केले.