संगमनेरमध्ये चिमुकलीवरील ॲसिड हल्ल्याच्या निषेधार्थ सुवर्णकार समाजाचा भव्य मूक मोर्चा

संगमनेर, प्रतिनिधी- 
संगमनेर तालुक्यातील वडगाव पान येथील शालेय विद्यार्थिनीवर अज्ञात व्यक्तीने केलेल्या अमानुष ॲसिड हल्ल्याच्या निषेधार्थ आज संगमनेर शहरात सुवर्णकार समाजाच्या वतीने भव्य मूक मोर्चा काढण्यात आला. 
या घटनेमुळे संपूर्ण तालुक्यात संतापाची लाट उसळली असून, सुवर्णकार समाज संघटनेसह सराफ, व्यापारी आणि विविध सामाजिक संघटनांचे पदाधिकारी व नागरिक मोठ्या संख्येने या आंदोलनात सहभागी झाले होते. बाजारपेठ, सय्यदबाबा चौक, मेनरोड या शहरातील प्रमुख मार्गावरून शांततेत काढण्यात आलेल्या या मूक मोर्चामध्ये सहभागी झालेल्या नागरिकांनी कोणतीही घोषणाबाजी न करता आपला तीव्र निषेध नोंदवला.
प्रांत अधिकारी, पोलीस उपअधीक्षक आणि पोलीस ठाण्यावर नेलेल्या मूक मोर्चेकर्‍यांनी पोलीस निरीक्षक समीर बारवकर, उपाधीक्षक कार्यालयाचे मोरे आणि नायब तहसीलदार माळवे यांना निवेदन दिले. या निवेदनात आरोपीला तातडीने अटक करून त्याच्यावर पोक्सो (POCSO) आणि भारतीय न्याय संहितेच्या कठोर कलमांखाली गुन्हा दाखल करण्याची मागणी करण्यात आली आहे, तसेच या गुन्ह्यासाठी फाशीच्या शिक्षेची मागणीही करण्यात आली आहे. या संवेदनशील प्रसंगी जखमी मुलीचे नातेवाईक आणि महिला मोठ्या संख्येने उपस्थित होत्या, ज्यांच्या भावनांनी संपूर्ण परिसर हेलावून गेला होता. प्रशासनाने याप्रकरणी तातडीने कठोर पावले उचलण्याची अपेक्षा जनतेने व्यक्त केली आहे.