संगमनेर, प्रतिनिधी-
तालुक्यातील वडगाव पान येथे एका अल्पवयीन शाळकरी मुलीवर भरदिवसा झालेल्या अमानुष ॲसिड हल्ल्यामुळे संपूर्ण तालुका हादरून गेला असून नागरिकांमध्ये तीव्र संतापाची लाट उसळली आहे. या घटनेच्या निषेधार्थ बुधवारी सकाळी वडगाव पान आणि तळेगाव फाटा परिसरातील ग्रामस्थ, महिला आणि तरुण मोठ्या संख्येने रस्त्यावर उतरले. संतप्त आंदोलकांनी महामार्ग अडवत जोरदार ‘रास्ता रोको’ केला आणि प्रशासनाच्या विरोधात घोषणाबाजी केली.
या आंदोलनात एकवीरा फाउंडेशनच्या अध्यक्षा डॉ. जयश्री थोरात, आमदार अमोल खताळ यांच्या पत्नी नीलम खताळ, माजी नगराध्यक्ष दुर्गाताई तांबे आणि नवनिर्वाचित नगराध्यक्षा डॉ. मैथिली तांबे यांसह अनेक मान्यवरांनी सहभाग नोंदवून पीडितेला न्याय देण्याची मागणी केली.
मंगळवारी दुपारी दोन वाजेच्या सुमारास ही संतापजनक घटना घडली जेव्हा इयत्ता सहावीत शिकणारी ही विद्यार्थिनी शाळा सुटल्यानंतर आपल्या सायकलवरून नेहमीप्रमाणे घरी जात होती. हाडकेमाळा परिसरात एका अज्ञात नराधमाने तिच्यावर अचानक ॲसिड फेकले. या भयानक हल्ल्यात मुलगी गंभीर जखमी झाली असून तिच्या चेहऱ्यासह शरीराचे विविध भाग भाजले आहेत. तिला तातडीने रुग्णालयात दाखल करण्यात आले असून सध्या तिची प्रकृती स्थिर असल्याची माहिती आहे.
सुमारे दीड ते दोन तास सुरू असलेल्या या रास्ता रोको आंदोलनादरम्यान आंदोलकांनी वडगाव-तळेगाव फाट्यावरील पोलीस चौकी तात्काळ कार्यान्वित करण्याची, शाळा सुटण्याच्या वेळी पोलीस गस्त वाढवण्याची आणि संपूर्ण परिसरात सीसीटीव्ही कॅमेरे बसवण्याची आग्रही मागणी केली.
स्थानिक लोकप्रतिनिधींनी देखील या घटनेची गंभीर दखल घेतली असून आमदार सत्यजित तांबे व आमदार अमोल खताळ यांनी हा प्रश्न विधिमंडळात मांडला आहे. त्यांनी पीडितेला आर्थिक मदत आणि आरोपीला कठोरात कठोर शिक्षा देण्याची मागणी केली आहे.
दरम्यान, संगमनेर तालुका पोलिसांनी या प्रकरणाचा तपास युद्धपातळीवर सुरू केला असून आरोपीचा शोध घेण्यासाठी विशेष पथके तैनात करण्यात आली आहेत. परिसरातील सीसीटीव्ही फुटेजची तपासणी केली जात आहे. केवळ आश्वासने नको तर अशा विकृत प्रवृत्तींना आळा घालण्यासाठी आरोपीला फाशीची शिक्षा व्हावी आणि महिलांच्या सुरक्षेसाठी ठोस उपाययोजना कराव्यात, अशी भावना यावेळी आंदोलक ग्रामस्थांनी व्यक्त केली. यावेळी मोठ्या प्रमाणात पोलीस बंदोबस्त तैनात करण्यात आला होता.
