अल्पवयीन मुलीवर अ‍ॅसिड हल्ला; आरोपीचे रेखाचित्र समोर

संगमनेर, प्रतिनिधी- 

संगमनेर तालुक्यातील वडगावपान परिसरात एका अल्पवयीन मुलीच्या चेहऱ्यावर अ‍ॅसिड सदृश्य द्रव पदार्थ एकूण हल्ला झाल्याची धक्कादायक घटना घडली. या प्रकरणाने संपूर्ण परिसरात खळबळ उडाली आहे. या अमानवीय कृत्यानंतर पोलिसांनी तपासाची चक्रे वेगाने फिरवली असून प्रत्यक्षदर्शींच्या माहितीवरून संशयित आरोपीचे रेखाचित्र तयार करण्यात आले आहे.

ही घटना मंगळवारी (१७ मार्च) घडली. पीडित मुलगी शाळेतून सायकलवरून घरी जात असताना हाडकीच्या ओढ्याकडून जाणाऱ्या महादेव मळ्याकडील कच्च्या रस्त्यावर एका अज्ञात इसमाने तिला अडवले. साधारण ३२ ते ३५ वयोगटातील या व्यक्तीने रस्ता विचारण्याच्या बहाण्याने मुलीला थांबवले आणि अचानक आपल्याकडील बाटलीतील अ‍ॅसिडसदृश द्रव पदार्थ तिच्या तोंडावर उजव्या बाजूने फेकला. 

या हल्ल्यात मुलगी गंभीर जखमी झाली असून आरोपी घटनास्थळावरून फरार झाला आहे.

याप्रकरणी संगमनेर तालुका पोलीस ठाण्यात गुन्हा रजी. नं १२६/२०२६ नुसार भारतीय न्याय संहिता कलम १२४ (१) आणि १२६ (२) अन्वये अज्ञात इसमाविरुद्ध गुन्हा दाखल करण्यात आला आहे. घटनेचे गांभीर्य लक्षात घेऊन तांत्रिक विश्लेषण गुन्हे शोध पथक अहिल्यानगर, फॉरेन्सिक युनिट संगमनेर आणि संगमनेर शहर व तालुका पोलिसांची विविध पथके आरोपीचा शोध घेत आहेत.

सध्या पीडित मुलीवर लोणी येथील प्रवरा मेडिकल ट्रस्टच्या पी.एम.टी रुग्णालयात उपचार सुरू आहेत. जनरल फिजिशियन, तज्ज्ञ प्लास्टिक सर्जन आणि नेत्रतज्ज्ञांच्या मार्गदर्शनाखाली तिच्यावर उपचार केले जात असून तिची प्रकृती सध्या स्थिर असल्याचे सांगण्यात आले आहे.

पोलिसांनी प्रसिद्धी पत्रकाद्वारे संशयित आरोपीचे रेखाचित्र जाहीर केले असून नागरिकांना आवाहन केले आहे की, रेखाचित्रातील व्यक्तीबाबत कोणासही काही खात्रीशीर माहिती मिळाल्यास किंवा ओळख पटल्यास त्यांनी तातडीने पोलीस प्रशासनाशी संपर्क साधावा. माहिती देणाऱ्याचे नाव गुप्त ठेवले जाईल असेही पोलिसांनी स्पष्ट केले आहे.

नागरिकांनी माहिती देण्यासाठी पोलीस निरीक्षक प्रवीण साळुंखे (९६८९९०३५८८), संगमनेर तालुका पोलीस स्टेशन (०२४२५-२२५४३३), सहाय्यक पोलीस निरीक्षक पी.एन. काळे (९८२२३००२३३) किंवा पोलीस उपनिरीक्षक महेश व्ही. शिंदे (९५२७९३०९९७) यांच्याशी संपर्क साधावा.