संगमनेरमध्ये पेट्रोल पंपांवर वाहनधारकांच्या लांबच लांब रांगा; इराण-इस्राईल युद्धाच्या पार्श्वभूमीवर इंधन टंचाईची भीती, प्रशासनाकडून अद्याप स्पष्टता नाही!

संगमनेर, प्रतिनिधी- 

इराण आणि इस्राईल यांच्यात सुरू असलेल्या युद्धसदृश परिस्थितीचे पडसाद आता स्थानिक पातळीवर उमटताना दिसत आहेत. संगमनेर शहरासह परिसरातील विविध पेट्रोल पंपांवर आज सकाळपासूनच वाहनधारकांची प्रचंड गर्दी उसळल्याचे चित्र पाहायला मिळाले. दरम्यान अचानक पेट्रोल पंपावर उसळलेल्या वाहनधारकांच्या गर्दीमुळे खरोखर पेट्रोलचे त्यांचाही निर्माण झाली का याबाबत साशंकता निर्माण झाली आहे. या संदर्भात अद्याप प्रशासनाकडून कोणताही खुलासा करण्यात आलेला नाही अथवा माहिती देण्यात आली नाही.

आंतरराष्ट्रीय स्तरावरील तणावामुळे येत्या काळात कच्च्या तेलाच्या किमती वाढण्याची किंवा इंधनाचा पुरवठा विस्कळीत होण्याची शक्यता वर्तवण्यात येत असल्याने, खबरदारीचा उपाय म्हणून नागरिकांनी पेट्रोल पंपांवर धाव घेतली आहे. त्यामुळे संगमनेर शहरातील सर्वच पेट्रोल पंपांवर वाहनधारकांच्या भल्या मोठ्या रांगा लागल्याचे दिसून आले. त्यातच भरीस भर म्हणून अचानक उसळलेली गर्दी बघून पेट्रोल पंप चालकांनी ऑनलाइन पेमेंट घेणे नाकारले. यामुळे देखील अनेकांचे वादाचे प्रसंग उद्भवले होते.

आज सकाळपासूनच शहरातील प्रमुख रस्त्यांवर असलेल्या पेट्रोल पंपांवर दुचाकी आणि चारचाकी वाहनांच्या लांबच लांब रांगा लागल्या होत्या. अनेक ठिकाणी ही गर्दी इतकी मोठी होती की वाहनांच्या रांगा थेट मुख्य रस्त्यापर्यंत पोहोचल्या, यामुळे शहरातील वाहतूक व्यवस्थेवर मोठा ताण आला आणि काही काळ वाहतूक कोंडीची समस्याही निर्माण झाली होती. अचानक निर्माण झालेल्या या परिस्थितीमुळे सर्वसामान्यांमध्ये पेट्रोल टंचाईबाबत भीतीचे आणि संभ्रमाचे वातावरण पाहायला मिळाले.

विशेषतः सोशल मीडियावर इराण-इस्राईल युद्धाचे जागतिक अर्थव्यवस्थेवर होणारे परिणाम आणि इंधन दरवाढीच्या चर्चांना उधाण आल्याने नागरिकांमध्ये घबराट पसरली आहे. भविष्यकाळात इंधन मिळणे कठीण होईल किंवा त्याचे दर गगनाला भिडतील, या भीतीने नागरिक आपल्या वाहनांच्या टाक्या पूर्ण भरून घेताना दिसत आहेत. पेट्रोल पंप चालकांनी परिस्थिती हाताळण्याचा प्रयत्न केला, मात्र वाहनांचा ओघ सतत वाढत राहिल्याने काही काळ गोंधळाची स्थिती निर्माण झाली होती. सध्या प्रशासनाकडून किंवा तेल कंपन्यांकडून इंधन तुटवड्याबाबत कोणतीही अधिकृत माहिती समोर आलेली नसली तरी, युद्धाच्या सावटाखालील अनिश्चिततेमुळे संगमनेरकर चिंतेत असल्याचे दिसून येत आहे.