माझ्यासोबत दोन दिवस फिरायला चल, मग तुझे मानधन मिळवून देतो; मानधन मिळवून देण्याच्या बहाण्याने संगमनेर पंचायत समितीमध्ये महिला कर्मचाऱ्याचा विनयभंग, संतापजनक प्रकारामुळे खळबळ

संगमनेर, प्रतिनिधी- 
संगमनेर पंचायत समितीच्या कार्यालयात एका महिला कर्मचाऱ्याचा विनयभंग झाल्याची धक्कादायक घटना समोर आली आहे. मानधन मिळवून देण्याच्या बहाण्याने एका अभियान व्यवस्थापकानेच महिला कर्मचाऱ्याचा गैरफायदा घेऊन तिचा विनयभंग केल्याचा आरोप करण्यात आला आहे. या घटनेमुळे परिसरात तीव्र संताप व्यक्त होत आहे.
मिळालेल्या माहितीनुसार, संबंधित महिला कर्मचारी ही एका महिला बचत गटात समुदाय संसाधन व्यक्ती (CRP) म्हणून कार्यरत आहे. गेल्या सहा महिन्यांपासून त्यांचे मानधन रखडलेले होते, त्यासाठी त्या सातत्याने पंचायत समिती कार्यालयात पाठपुरावा करत होत्या. याच संदर्भात २३ मार्च रोजी दुपारी त्या पंचायत समिती कार्यालयात गेल्या होत्या. तिथे भेटल्यावर त्यांनी अभियान व्यवस्थापक नंदलाल पोपटराव कोकाटे यांना आपल्या रखडलेल्या मानधनाबाबत विचारणा केली.
यावेळी, कार्यालयात महिला कर्मचारी एकटी असल्याचे पाहून अभियान व्यवस्थापकाने संधी साधली आणि अश्लील वर्तन केले. त्याने महिलेला अनुचित स्पर्श करत शारीरिक जवळीक साधण्याचा प्रयत्न केला. इतकेच नाही, तर ‘माझ्यासोबत दोन दिवस फिरायला चल, मग तुझे मानधन मिळवून देतो’ असे म्हणत तिला लज्जास्पद मागणी केली. या प्रकारामुळे घाबरलेल्या आणि अपमानित झालेल्या पीडित महिलेने तातडीने कार्यालयातून काढता पाय घेतला.
घटनेनंतर पीडितेने आपल्या पतीला आणि सामाजिक कार्यकर्त्यांना या सर्व प्रकाराची माहिती दिली. त्यांना धीर मिळाल्यानंतर पीडित महिलेने संगमनेर शहर पोलीस ठाण्यात धाव घेऊन तक्रार दाखल केली आहे. पोलिसांनी याप्रकरणी दखल घेतली असून, पुढील कायदेशीर कार्यवाही सुरू आहे. या घटनेमुळे पंचायत समितीसारख्या शासकीय कार्यालयात महिला कर्मचाऱ्यांच्या सुरक्षिततेचा प्रश्न ऐरणीवर आला आहे.