नाशिक/कोपरगाव:
नाशिक येथील स्वयंघोषित भोंदू बाबा अशोक खरात याच्याविरुद्ध सरकारवाडा पोलीस ठाण्यात दाखल असलेल्या गंभीर गुन्ह्यांचा तपास सध्या ‘विशेष तपास पथक’ (SIT) करत आहे. या तपासादरम्यान एक अत्यंत गंभीर बाब समोर आली आहे. या प्रकरणातील पीडित महिलांचे अश्लील व्हिडिओ सोशल मीडियावर मोठ्या प्रमाणावर प्रसारित केले जात असून, यामुळे पीडितांच्या गोपनीयतेचा भंग होत असल्याचे पोलिसांच्या निदर्शनास आले. महिलांच्या सन्मानाला ठेच पोहचवणारी ही विकृती रोखण्यासाठी पोलिसांनी तातडीने तांत्रिक शोधमोहीम हाती घेतली आणि गुन्हेगारांच्या मुसक्या आवळण्यास सुरुवात केली आहे.
या तपासाचे धागेदोरे अहिल्यानगर जिल्ह्यातील कोपरगावपर्यंत पोहोचले आहेत. कोपरगाव येथील ‘BMW’ नावाच्या व्हॉट्सॲप ग्रुपवर राहुल गंगाधर शिंदे याने पीडित महिलांचे अश्लील व्हिडिओ प्रसारित केल्याचे तांत्रिक तपासात स्पष्ट झाले. पोलिसांनी या प्रकरणाचा अधिक सखोल तपास केला असता, हे व्हिडिओ त्याला योगेश पंढरीनाथ आढाव याने पाठवल्याचे समोर आले. तसेच, योगेशला हे व्हिडिओ माजलगाव (जि. बीड) येथील संदिप गर्जे याने पुरवल्याचे तपासात निष्पन्न झाले आहे. या तिघांविरुद्ध कोपरगाव शहर पोलीस ठाण्यात भारतीय न्याय संहिता (BNS) आणि माहिती तंत्रज्ञान कायद्याच्या विविध कलमान्वये गुन्हे दाखल करण्यात आले आहेत.
पोलिसांनी या कारवाईत राहुल शिंदे आणि योगेश आढाव या दोघांना अटक केली असून, फरार असलेल्या संदिप गर्जे याचा शोध युद्धपातळीवर सुरू आहे. या घटनेचे गांभीर्य ओळखून विशेष तपास पथकाने जाहीर आवाहन केले आहे की, अशा प्रकारचे अश्लील व्हिडिओ किंवा पीडितेची ओळख पटेल असे कोणतेही साहित्य कोणाकडे असल्यास ते तात्काळ डिलीट करावे. जर सोशल मीडिया, व्हॉट्सॲप ग्रुप किंवा विविध प्रकारच्या माध्यमातून हे साहित्य प्रसारित केल्यास, संबंधित व्यक्तीसह ग्रुप ॲडमिनवरही कठोर कायदेशीर कारवाई करून त्यांना अटक करण्यात येईल, असा इशारा पोलिसांनी दिला आहे.
