पाथर्डी:
अहिल्यानगर जिल्ह्यातील पाथर्डी तालुक्यात एका अज्ञात महिलेची निर्घृण हत्या झाल्याची धक्कादायक घटना उघडकीस आली आहे. मौजे कासार पिंपळगाव येथील मुळा पाटबंधारे विभागाच्या कॅनॉलमध्ये एका पांढऱ्या रंगाच्या गोणीत दोरीने बांधलेल्या अवस्थेत या महिलेचा मृतदेह शुक्रवारी सकाळी आढळून आला. या घटनेमुळे परिसरात मोठी खळबळ उडाली असून पोलीस सध्या आरोपीचा शोध घेत आहेत.
मिळालेल्या माहितीनुसार, २७ मार्च २०२६ रोजी सकाळी १० वाजेच्या सुमारास कासार पिंपळगाव येथील ग्रामपंचायत सार्वजनिक विहिरीजवळील कॅनॉलमध्ये एक संशयास्पद गोणी तरंगताना नागरिकांना दिसली. याबाबतची माहिती मिळताच पाथर्डी पोलीस ठाण्याचे पोलीस कर्मचारी अमोल बंकट जवरे यांनी घटनास्थळी धाव घेतली.
गोणी उघडली असता त्यात एका अनोळखी महिलेचा मृतदेह आढळून आला. प्राथमिक अंदाजानुसार, अज्ञात आरोपीने या महिलेचा खून करून पुरावा नष्ट करण्याच्या उद्देशाने मृतदेह गोणीत भरून कॅनॉलच्या पाण्यात फेकून दिला आहे. मृतदेह काही प्रमाणात कुजलेल्या अवस्थेत असल्याची माहिती पोलिसांनी दिली आहे.
मृत महिलेचे वर्णन पोलिसांनी जाहीर केले असून, तिचे वय अंदाजे ५५ ते ६० वर्षे, उंची १६० सेंटीमीटर आणि रंग गोरा आहे. तिचे केस काळे-पांढरे असून अंगात काळ्या रंगाचा ब्लाउज आणि जांभळ्या रंगाची नऊवारी साडी आहे. महिलेच्या हातात चॉकलेटी सोनेरी रंगाच्या काचेच्या बांगड्या आणि गळ्यात काळ्या व पिवळ्या धातूच्या मण्यांचे मंगळसूत्र आहे. विशेष म्हणजे, तिच्या उजव्या हातावर ‘पाच आसरा’ गोंदलेले आहे.
या प्रकरणी पाथर्डी पोलीस ठाण्यात भारतीय न्याय संहिता २०२३ च्या कलम १०३(१) आणि २३८ अन्वये अज्ञात आरोपीविरुद्ध गुन्हा दाखल करण्यात आला आहे. जिल्हा पोलीस अधीक्षक सोमनाथ घार्गे, अपर पोलीस अधीक्षक वैभव कलुबर्मे आणि उपविभागीय पोलीस अधिकारी नीरज राजगुरू यांच्या मार्गदर्शनाखाली पोलीस निरीक्षक विलास पुजारी या प्रकरणाचा अधिक तपास करत आहेत.
