अहिल्यानगर –
पारनेर तालुक्यातील निघोज येथील एसबीआय बँकेचे एटीएम मशीन लोखंडी हत्याराच्या सहाय्याने फोडून चोरी करण्याचा प्रयत्न करणाऱ्या पंजाबमधील एका सराईत आरोपीला जेरबंद करण्यात पारनेर पोलिसांना यश आले आहे.
या प्रकरणी संकेत चंद्रशेखर वैद्य (वय ४०, रा. नाशिक) यांनी पारनेर पोलीस ठाण्यात फिर्याद दिली होती. २२ मार्च २०२६ रोजी पहाटेच्या सुमारास एका अज्ञात इसमाने चेहऱ्यावर रुमाल बांधून ओळख लपवत आत प्रवेश करून लोखंडी हत्याराचे सहाय्याने एटीएम मशीन फोडून एटीएम मधील पैसे चोरी करण्याचा प्रयत्न केला होता.
या घटनेची माहिती मिळताच उपविभागीय पोलीस अधिकारी शिरीष वमने यांनी तातडीने घटनास्थळी भेट देऊन तपासाच्या सूचना दिल्या होत्या. पोलीस निरीक्षक संतोष खेडकर यांच्या मार्गदर्शनाखाली विशेष तपास पथक तयार करून गुन्ह्याचा उलगडा करण्यास सुरुवात करण्यात आली.
तांत्रिक तपास आणि गोपनीय बातमीदारांकडून मिळालेल्या माहितीच्या आधारे पोलिसांनी आरोपी संदीप भजन सिंग वय-२२, मूळ रा. महालेवाला, पोस्ट-फतेगड पंजतूर, जि. फिरोजपूर (पंजाब) याला शिरूर येथून ताब्यात घेतले. आरोपी सध्या निघोज येथे वास्तव्यास होता. या अटकेमुळे जिल्ह्यातील व राज्यातील एटीएम चोरीचे मोठे गुन्हे उघडकीस येण्याची शक्यता पोलिसांनी वर्तवली आहे. आरोपीला न्यायालयात हजर केले असता त्याला दोन दिवसांची पोलीस कोठडी सुनावण्यात आली आहे.
ही यशस्वी कारवाई पोलीस अधीक्षक सोमनाथ घार्गे, अपर पोलीस अधीक्षक वैभव कलुबर्मे आणि उपविभागीय पोलीस अधिकारी शिरीष वमने यांच्या मार्गदर्शनाखाली पारनेर पोलीस ठाण्याचे पोलीस निरीक्षक संतोष खेडकर, सहाय्यक पोलीस निरीक्षक नितीन खंडागळे, पोलीस उपनिरीक्षक शिवाजी कडुस, पोलीस हेड कॉन्स्टेबल अमोल धामणे, कल्याण लगड, पोलीस कॉन्स्टेबल गणेश डोंगरे, सारंग वाघ, विजय जाधव, सागर साबळे आणि प्रकाश बोबडे यांच्या पथकाने केली आहे. या गुन्ह्याचा पुढील तपास पोलीस उपनिरीक्षक शिवाजी कडुस हे करत आहेत.
