शिर्डी, विशेष प्रतिनिधी-
महिलांचे लैंगिक शोषण करणाऱ्या भोंदू बाबा खरात याचा आणखी एक नवा कारनामा समोर आला आहे. यामुळे खरातच्या अडचणीत वाढ झाली आहे. शिर्डी येथील जमीन व्यवहारात कोट्यवधी रुपयांची आर्थिक फसवणूक करत बेकायदेशीर सावकारी प्रकरणी शिर्डी पोलिसांनी मोठी कारवाई केली आहे. या प्रकरणात मुख्य आरोपी कॅप्टन अशोककुमार एकनाथ खरात, त्यांची पत्नी कल्पना खरात आणि इतर तीन साथीदारांविरुद्ध गुन्हा दाखल करण्यात आला असून, पोलिसांनी यातील दोन आरोपींना अटक केली आहे.
मिळालेल्या माहितीनुसार, ऑगस्ट २०२३ पासून शिर्डी, नाशिक आणि राहाता परिसरात हा जमीन व्यवहाराचा घोळ सुरू होता. पीडित व्यक्तीला पैशांची गरज असताना कॅप्टन अशोककुमार खरात याने दरमहा दोन टक्के व्याजाने पैसे दिले होते. याशिवाय अतिरिक्त २ कोटी ५२ लाख रुपये देऊन त्यातील १ कोटी ६४ लाख रुपये पुन्हा व्याजापोटी विविध मध्यस्थांच्या माध्यमातून परत घेतले.
पीडित व्यक्तीने व्याजाचे पैसे परत केले असतानाही आणि उर्वरित व्यवहाराचा हिशोब पूर्ण करण्याची तयारी दर्शवली असतानाही, आरोपींनी जाणीवपूर्वक टाळाटाळ केली. एवढेच नव्हे तर पीडित व्यक्तीची हक्काची चार एकर जमीन त्यांच्या नावावर करून न देता आरोपींनी त्यांची फसवणूक केली.
या गंभीर प्रकरणात पीडित व्यक्तीचे स्वाक्षरी केलेले कोरे चेकबुक विश्वासाने एका आरोपीकडे ठेवले होते, याचा गैरवापर करून खात्यातील रक्कम परस्पर वर्ग करण्यात आल्याचेही समोर आले आहे.
याप्रकरणी फिर्यादीने दिलेल्या तक्रारीवरून शिर्डी पोलीस ठाण्यात गुन्हा रजिस्टर नंबर २१३/२६ नुसार भारतीय न्याय संहिता (BNS) कलम ३१६(२), ३१८(२), ३१८(४) आणि महाराष्ट्र सावकारी अधिनियम २०१४ चे कलम ३९ व ४४ अन्वये गुन्हा दाखल करण्यात आला असल्याची माहिती वरिष्ठ पोलीस अधिकाऱ्यांनी दिली.
या प्रकरणात कॅप्टन अशोककुमार खरात, त्याची पत्नी कल्पना खरात, किरण नानासाहेब सोनवणे, अरविंद पांडुरंग वावके आणि अशोक परभत तांबे अशा पाच जणांवर गुन्हा नोंदवण्यात आला असून, पोलिसांनी तात्काळ कारवाई करत आरोपी किरण सोनवणे आणि अरविंद बावके यांना बेड्या ठोकल्या आहेत. या घटनेमुळे शिर्डी परिसरात मोठी खळबळ उडाली असून पोलीस अधिक तपास करत आहेत.
