महाराष्ट्र संवाद न्यूज ऑनलाईन, संगमनेर
समनापूर येथे दारूच्या दुकानात घुसून तोडफोड केल्याप्रकरणी आणि दुकानदाराला जीवे मारण्याची धमकी दिल्याप्रकरणी १२ जणांविरुद्ध गुन्हा दाखल करण्यात आला आहे. ही घटना गुरुवारी (२ एप्रिल) सकाळी ११ ते १२ च्या सुमारास घडली. या प्रकरणी दिनेश मुरलीधर मिलाने यांनी संगमनेर शहर पोलीस ठाण्यात फिर्याद दिली आहे.
फिर्यादी दिनेश मिलाने हे हॉटेल व्यावसायिक असून समनापूर गावात त्यांचे सरकारमान्य देशी दारूचे दुकान आहे. घटनेच्या दिवशी आरोपी देवा शेरमाळे आणि वंदना शेरमाळे यांनी दुकानात येऊन तेथे दारूचा व्यवसाय करू नये, असे म्हणत दुकानातील कामगार संतोष रावसाहेब गवळी याला शिवीगाळ केली.
त्यानंतर संतोष यांनी घटनेची माहिती दुकानमालक दिनेश मिलाने यांना दिली. दिनेश मिलाने घटनास्थळी पोहोचले असता, तिथे देवा शेरमाळे, वंदना शेरमाळे, रियाज सिराज शेख, रियाजची पत्नी, रियाजची आई, राजु आबु शेख, माम्या शेरमाळे, बंडू इनामदार, संतोष शेरमाळे, प्रविण गायकवाड, संदीप दळवी आणि योगेश नवनाथ आव्हाड हे सर्वजण एकत्र आले.
आरोपींनी दुकानातील कामगाराला शिवीगाळ करत दुकानातील दारूचे बॉक्स आणि ग्लास फोडून मोठे नुकसान केले. तसेच, दुकानातील सीसीटीव्ही कॅमेरे आणि डीव्हीआर तोडून टाकले. यावेळी दिनेश मिलाने यांनी आरोपींना समजावण्याचा प्रयत्न केला असता, त्यांनाही शिवीगाळ करण्यात आली. यापुढे दुकान चालवायचे नाही, अशी धमकी देत आरोपींनी दुकानाचे शटर बंद करून कुलूप लावले आणि तेथून निघून गेले.
दिनेश मिलाने यांच्या तक्रारीवरून पोलिसांनी भारतीय न्याय संहिताच्या विविध कलमान्वये गुन्हा दाखल केला आहे. या प्रकरणाचा पुढील तपास पोलीस कॉन्स्टेबल संगीता शिवाजी कोकणे करत आहेत.
