नाशिकमध्ये पुन्हा खळबळ: भोंदू खरात सारखेच प्रकरण समोर, ऑफिसबॉयच्या चोरीतून पत्रकाराचे काळे कारनामे उघड

महाराष्ट्र संवाद न्यूज ऑनलाईन, ​नाशिक
नाशिकमधील सातपूर परिसरात एका धक्कादायक घटनेत एका प्रथितयश पत्रकाराचा खरा चेहरा समोर आला असून, त्याने गेल्या दोन दशकांपासून अनेक गरीब महिलांचे लैंगिक शोषण केल्याचे उघड झाले आहे. खंडणी प्रकरणातील फिर्यादीच आरोपी म्हणून समोर आल्याने मोठी खळबळ उडाली आहे.
​रवींद्र एरंडे (वय ६३) असे या संशयित पत्रकाराचे नाव असून, तो एका साप्ताहिक आणि यूट्यूब चॅनेलशी संबंधित आहे. एरंडे हा सातपूर भागातील कामगारनगर आणि श्रमिकनगरमध्ये लघू उद्योगांसाठी ‘कन्सल्टंट’ म्हणून काम करत असे. लघू उद्योग सुरू करून देण्याचे आमिष दाखवून त्याने सन २००३ ते २०२४ या २१ वर्षांच्या काळात अनेक गरीब महिलांना आपल्या जाळ्यात ओढले. या महिलांच्या हतबलतेचा फायदा घेत, त्याने त्यांचे लैंगिक शोषण केले आणि आपल्या सातपूर कॉलनीतील नीळकंठेश्वर नगरातील कार्यालयात लपून छपून त्याचे चित्रीकरण केले. हे अश्लील व्हिडिओ त्याने एका खासगी टॅब आणि हार्ड डिस्कमध्ये पीडित महिलांच्या नावे स्वतंत्र फोल्डर करून जतन केले होते.
​या संपूर्ण प्रकरणाचा भंडाफोड त्याच्याच कार्यालयातील आकाश बकरे या ऑफिसबॉयने केला. बकरे याला संपादकाच्या या कृत्याचा सुगावा लागला होता. त्याने संधी साधून कार्यालयातून तो टॅब आणि हार्ड डिस्क चोरली. त्यामध्ये पन्नासपेक्षा जास्त अश्लील व्हिडिओ असल्याचे पाहून आकाशने आपल्या तीन मित्रांच्या मदतीने एरंडेला ब्लॅकमेल करण्यास सुरुवात केली. व्हिडिओ व्हायरल न करण्याच्या बदल्यात त्यांनी १२ लाख रुपयांच्या खंडणीची मागणी केली.
या धाकाने घाबरलेल्या एरंडेने सुरुवातीला १० हजार रुपये दिले, मात्र पैशांची मागणी वाढू लागली. वारंवार होणाऱ्या ब्लॅकमेलिंगला कंटाळून आणि आपली बदनामी होईल या भीतीने, एरंडेने २ एप्रिल २०२६ रोजी सातपूर पोलीस ठाण्यात धाव घेतली आणि टॅब व हार्ड डिस्क चोरीची तसेच खंडणीची फिर्याद नोंदवली.
​पोलिसांनी या तक्रारीची दखल घेत तातडीने तपास सुरू केला. पोलीस आयुक्त संदीप कर्णिक आणि झोन दोनचे उपायुक्त किशोर काळे यांनी प्रकरणाचे गांभीर्य ओळखून सातपूरचे वरिष्ठ निरीक्षक प्रकाश अहिरे आणि गुन्हे शाखा युनिट दोनच्या पथकाला तपासाचे आदेश दिले.
पोलिसांनी तांत्रिक विश्लेषण करून संशयितांचा माग काढला आणि गुरुवारी (दि. २) आडगाव शिवारातील दहावा मैल परिसरातून आकाश पुंडलिक बकरे (२८, रा. सातपूर), प्रकाश रामदास पानपाटील (२५, रा. सातपूर कॉलनी), सुरज सुनील गवई (२७, रा. सातपूर) आणि श्रीपत भीमराव शिंदे (३८, रा. त्र्यंबकेश्वर) या चौघांना अटक केली.
​या अटकेनंतर पोलिसांनी जप्त केलेली हार्ड डिस्क, दोन पेनड्राइव्ह आणि मोबाईल यांची तपासणी केली असता, अधिकार्‍यांना धक्काच बसला. त्यात २००३ ते २०२४ या काळात विविध महिलांचे पन्नासपेक्षा जास्त अश्लील व्हिडिओ आढळून आले.
त्यानंतर, पीडित महिलेने दिलेल्या फिर्यादीनुसार, सरकारी नोकरी लावण्याचे आमिष दाखवून विविध हॉटेल्सवर नेऊन लैंगिक शोषण केल्याची बाब समोर आली. या गंभीर प्रकरणाची दखल घेत सातपूर पोलीस स्टेशनमध्ये गुन्हा नोंदविण्यात आला.
​पोलिस उपायुक्त किशोर काळे यांनी या प्रकरणावर माहिती देताना सांगितले की, संशयिताकडून हस्तगत केलेल्या डेटावरून संपूर्ण प्रकरणाचे गांभीर्य स्पष्ट होत आहे. जेवढ्या महिला या संशयिताच्या शोषणाला बळी पडल्या आहेत, त्यांनी न घाबरता तक्रार देण्यासाठी पुढे यावे. पीडित महिलांची ओळख पोलीस पूर्णपणे गोपनीय ठेवतील. सध्या या प्रकरणाचा सखोल तपास सुरू असून, दोषींवर कठोर कारवाई केली जाईल, असे आश्वासनही त्यांनी दिले आहे.