महाराष्ट्र संवाद न्यूज ऑनलाईन, शिर्डी
संगमनेर तालुक्यातील वडगावपान येथील ॲसिड हल्ला प्रकरणातील पीडित मुलीची महिला व बालविकास मंत्री आदिती तटकरे यांनी रविवारी लोणी येथील प्रवरा रुग्णालयात जाऊन भेट घेतली. या निंदनीय घटनेतील पीडितेच्या पाठीशी शासन पूर्ण ताकदीने उभे असून, तिच्या पुढील उपचारांचा संपूर्ण खर्च शासन करणार असल्याची स्पष्ट ग्वाही त्यांनी दिली.
रुग्णालयात उपचार घेत असलेल्या या मुलीची प्रकृती सध्या स्थिर असल्याचे डॉक्टरांनी सांगितले आहे. मात्र, तिचे वय लहान असल्याने आणि त्वचा संवेदनशील असल्याने तिला आणखी काही दिवस विशेष उपचारांची तसेच एका शस्त्रक्रियेची आवश्यकता आहे.
प्रशासनाकडून तिची उत्तम काळजी घेतली जात असून, विशेष समुपदेशकाद्वारे तिचे समुपदेशन करण्यात आले आहे. हे समुपदेशन स्थानिक डॉक्टरांच्या मदतीने पुढेही प्रभावीपणे सुरू ठेवण्याबाबत मंत्री तटकरे यांनी सूचना दिल्या आहेत.
पीडितेच्या कुटुंबावर उपचारांचा कोणताही आर्थिक भार पडू नये, यासाठी पालकमंत्री डॉ. राधाकृष्ण विखे-पाटील यांच्या मार्गदर्शनाखाली शासन सर्वतोपरी मदत करत आहे. यामध्ये महिला व बालविकास विभागाच्या ‘मनोधैर्य’ योजनेअंतर्गत पीडितेस एक लाख रुपयांचे आर्थिक साहाय्य तत्काळ दिले जाणार आहे. तसेच, न्याय विभागाच्या ‘व्हिक्टिम कॉम्पेन्सेशन स्कीम २०२२’ अंतर्गत पीडितेच्या कुटुंबाला तातडीची मदत म्हणून ३ लाख रुपयांचा निधी आधीच वितरित करण्यात आला आहे.
या प्रकरणाच्या तपासाबाबत माहिती देताना मंत्री तटकरे यांनी सांगितले की, आपण घटनेच्या दिवसापासूनच पोलीस अधीक्षकांच्या संपर्कात आहोत. स्थानिक लोकप्रतिनिधींनीही हा प्रश्न सभागृहात लावून धरला होता. सध्या आरोपीचा शोध घेण्यासाठी पोलिसांकडून युद्धपातळीवर तपास सुरू असून, त्यासाठी विविध यंत्रणांची मदत घेतली जात आहे. कुटुंबाकडे या प्रकरणाबाबत काही विशेष माहिती असल्यास त्यांनी ती पोलिसांना द्यावी, तसेच त्यांच्या काही अन्य मागण्या असल्यास त्या मांडाव्यात, असे आवाहनही त्यांनी या वेळी केले.
या सांत्वनपर भेटीच्या वेळी पीडित मुलीची आई, मावशी व मामा उपस्थित होते. त्यांच्यासोबत आमदार काशिनाथ दाते, आमदार अमोल खताळ, जिल्हा पोलीस अधीक्षक सोमनाथ घार्गे, अपर पोलीस अधीक्षक सोमनाथ वाकचौरे आणि जिल्हा महिला व बालविकास अधिकारी संजय कदम आदी मान्यवर उपस्थित होते.
