महाराष्ट्र संवाद न्यूज ऑनलाईन, शिर्डी
सिन्नर (नाशिक) येथील वादग्रस्त भोंदूबाबा अशोक खरात प्रकरणाने आता राजकीय वळण घेतले असून, या प्रकरणाचे धागेदोरे थेट रूपाली चाकणकर यांच्या कुटुंबापर्यंत पोहोचले आहेत. राज्य महिला आयोगाच्या माजी अध्यक्षा रूपाली चाकणकर यांची सख्खी बहीण प्रतिभा चाकणकर आणि पुतण्या तन्मय चाकणकर यांची शिर्डी पोलीस ठाण्यात गेल्या गोपनीय आणि कसून चौकशी सुरू आहे.
समता पतसंस्थेमध्ये चाकणकर कुटुंबाच्या नावे असलेल्या चार बँक खात्यांमधून मोठ्या प्रमाणावर आर्थिक व्यवहार झाल्याचे तपासात समोर आले असून, या व्यवहारांचा अशोक खरातशी काही संबंध आहे का, याचा शोध पोलीस घेत आहेत.
सकाळपासूनच या दोघांचे सविस्तर जबाब नोंदवले जात आहेत. यापूर्वी अशोक खरातशी असलेल्या कथित संबंधांमुळेच रूपाली चाकणकर यांना आपल्या पदाचा राजीनामा द्यावा लागला होता. आता थेट त्यांच्या कुटुंबीयांची चौकशी सुरू झाल्याने राजकीय वर्तुळात मोठी खळबळ उडाली आहे. भोंदूबाबाच्या आर्थिक साम्राज्यात आणखी कोणाचे हितसंबंध गुंतले आहेत, हे या तपासातून स्पष्ट होण्याची शक्यता वर्तवण्यात येत आहे.
