महाराष्ट्र संवाद न्यूज ऑनलाईन, संगमनेर:
संगमनेर शहर पोलीस ठाण्याच्या हद्दीत माणुसकीला काळिमा फासणारी एक संतापजनक घटना समोर आली आहे. आपल्या साडेतीन वर्षांच्या पुतणीचा विनयभंग करून तिच्या आईवर (भावजयीवर) जीवघेणा हल्ला करणाऱ्या एका नराधम चुलत्याला पोलिसांनी अटक केली आहे. संतोष शंकर राऊत (वय ३४, रा. घुलेवाडी, संगमनेर) असे अटक करण्यात आलेल्या आरोपीचे नाव आहे.
अटक केलेल्या आरोपीला बुधवारी न्यायालयात हजर केले असता, सहाय्यक सरकारी वकील मच्छिंद्र गवते यांनी आरोपीने केलेला गुन्हा गंभीर स्वरूपाचा असल्याचे न्यायालयाच्या निदर्शनास आणून दिले. न्यायाधीश मंदार नेरलेकर यांनी गुन्ह्याचे गांभीर्य लक्षात घेऊन आरोपी संतोष राऊत याला १८ एप्रिलपर्यंत पोलीस कोठडी सुनावली आहे.
मिळालेल्या माहितीनुसार, १३ एप्रिल २०२६ रोजी ही घटना घडली. फिर्यादी महिला आपल्या ३ वर्षे ५ महिने वयाच्या चिमुरडीला आंघोळ घालून बेडवर ठेवून स्वतः आंघोळीला गेली होती. याच संधीचा फायदा घेऊन आरोपी संतोष राऊत याने पीडित चिमुरडीच्या गुप्तांगाला स्पर्श करून तिचा विनयभंग केला.
महिला बाथरूममधून बाहेर आली असता, तिला हा धक्कादायक प्रकार दिसला. तिने जाब विचारला असता आरोपीने तिच्याशी अश्लील भाषेत बोलून तिचा विनयभंग केला. इतकेच नाही तर, मी तुझ्या मुलीशी संबंध ठेवीन अशी धमकी देत त्याने पीडितेच्या छातीवर दाब देऊन तिला ढकलून दिले. आरोपीने घरातील चाकूने महिलेवर वार करण्याचा प्रयत्न केला आणि रागाच्या भरात पाण्याचा माठ तिच्या अंगावर फेकून मारला. महिलेच्या आरडाओरड्यामुळे शेजारी धावून आल्याने मोठा अनर्थ टळला.
घटनेनंतर फिर्यादीने दिलेल्या तक्रारीवरून संगमनेर शहर पोलिसांनी आरोपी विरोधात तात्काळ गुन्हा रजिस्टर नंबर ३००/२०२६ दाखल केला. आरोपीवर भारतीय नागरिक संहिता २०२३ मधील कलम ६४(२)(I)(F), ६५(२), ७४, ७५, ११८(१), ३५१(२), ३५२ आणि पोक्सो कायद्याच्या कलम ४, ६, ८ व १२ नुसार गुन्हा नोंदवण्यात आला आहे.
पोलीस उपनिरीक्षक फराहनाज पटेल यांनी तांत्रिक तपासाच्या आधारे आरोपीचे लोकेशन शोधून त्याला अकोले येथून शिताफीने ताब्यात घेतले. १४ एप्रिलच्या मध्यरात्री त्याला अधिकृतपणे अटक करण्यात आली.
या गुन्ह्याचे स्वरूप अत्यंत गंभीर असून आरोपीने गुन्ह्यात वापरलेला चाकू जप्त करणे, पीडित बालिकेच्या अंगावरील कपडे जप्त करणे आणि आरोपीची वैद्यकीय तपासणी करणे अद्याप बाकी आहे. या तपासासाठी पोलिसांनी न्यायालयात ५ दिवसांची पोलीस कोठडी मागितली असता न्यायालयाने १८ एप्रिल पर्यंत आरोपीला पोलीस कोठडीत ठेवण्याचे आदेश दिले आहे. या प्रकरणाचा पुढील तपास संगमनेर शहर पोलीस ठाण्याच्या पोलीस उपनिरीक्षक फराहनाज पटेल करत आहेत.
