महाराष्ट्र संवाद न्यूज ऑनलाईन, नाशिक:
लग्नाचे खोटे आमिष दाखवून दोन वेगवेगळ्या घटनांमध्ये दोन तरुणींवर लैंगिक अत्याचार झाल्याचे धक्कादायक प्रकार उघडकीस आले आहेत. याप्रकरणी नाशिकच्या सिडको आणि सातपूर पोलीस ठाण्यात एकूण सहा जणांविरुद्ध गुन्हे दाखल करण्यात आले आहेत.
पहिल्या घटनेत सिडको परिसरातील एका तरुणीला प्रेमाच्या जाळ्यात ओढून संशयित आरोपी अर्शील साबीर मन्सूरी याने लग्नाचे आमिष दाखवले. त्यानंतर हॉटेल डेमॉक्रसी येथे नेऊन तिच्यावर वारंवार अत्याचार केले. इतकेच नव्हे तर आरोपीने पीडितेचे अश्लील व्हिडिओ रेकॉर्ड करून तिला धमकावले आणि तिच्याकडील सोन्याची चैन व कानातील दागिने जबरदस्तीने काढून घेतले.
या गुन्ह्यात अर्शील मन्सूरीला मदत करणाऱ्या दीपक, हिमांशू, नितेश आणि प्रथमेश या त्याच्या साथीदारांविरुद्धही एमआयडीसी पोलीस ठाण्यात गुन्हा नोंदवण्यात आला असून सहायक पोलीस निरीक्षक पांडे या प्रकरणाचा अधिक तपास करत आहेत.
दुसरी घटना सातपूर परिसरात घडली असून, येथे श्रेयस ऊर्फ राज निलेश दिघे या २१ वर्षीय तरुणाने एका तरुणीचा विश्वास संपादन करून तिला लग्नाचे आमिष दाखवले. त्यानंतर त्याने पीडितेवर फाशीच्या डोंगराजवळील एका लॉजवर नेऊन वारंवार अत्याचार केले. जेव्हा पीडितेने लग्नाबाबत विचारणा केली, तेव्हा आरोपीने तिला मारहाण करून लग्नास नकार दिला.
हा प्रकार सप्टेंबर २०२५ ते मार्च २०२६ या कालावधीत घडला असून, सातपूर पोलिसांनी आरोपी श्रेयस दिघेविरुद्ध बलात्काराचा गुन्हा दाखल केला आहे. पोलीस उपनिरीक्षक दहिफळे या घटनेचा पुढील तपास करत आहेत.
