महाराष्ट्र संवाद न्यूज ऑनलाईन, संगमनेर:
पुणे-नाशिक महामार्गावरील डोळासणे शिवारात दरोडा टाकण्याच्या तयारीत असलेल्या एका सराईत टोळीला घारगाव पोलिसांनी पकडले. पोलिसांनी या कारवाईत चार आरोपींना अटक केली असून, त्यांच्याकडून कारसह दरोड्याचे साहित्य आणि मोबाईल असा एकूण ४ लाख रुपयांचा मुद्देमाल जप्त केला आहे. दरम्यान, पोलीस कोठडीत असताना केलेल्या चौकशीत या आरोपींनी घारगाव हद्दीत ट्रकमधून डिझेल चोरी केल्याचे दोन गुन्हे कबूल केले आहेत.
याबाबत अधिक माहिती अशी की, दि. १४ एप्रिल रोजी पहाटे ३:३० वाजेच्या सुमारास पोलीस ठाण्याचे पोलीस पथक पुणे-नाशिक हायवेवर रात्रगस्त घालत होते. यावेळी डोळासणे गावच्या बोगद्याजवळ अंधारात एक पांढऱ्या रंगाची स्विफ्ट कार संशयास्पदरित्या उभी असल्याचे त्यांच्या निदर्शनास आले. पथकाने तात्काळ कारला वेढा घातला.
पोलिसांची चाहूल लागताच कारमधील पाच जणांनी पळून जाण्याचा प्रयत्न केला. मात्र, पोलिसांनी पाठलाग करून चौघांना जागीच पकडले, तर रितेश वसंत सदाफळ (रा. गणेश नगर, ता. राहाता) हा अंधाराचा फायदा घेऊन पसार झाला. पकडलेल्या आरोपींनी सुरुवातीला नावे सांगण्यास टाळाटाळ केली, मात्र पोलिसांनी हिसका दाखवताच त्यांनी आपली नावे जीवन दत्तात्रय कांदे (वय १८, रा. श्रीरामपूर), तन्मय जितेंद्र कापसे (वय १७, रा. वाकडी, ता. श्रीरामपूर), आशिष अनिल पवार (वय १८, रा. येवला, हल्ली नेवासा फाटा) आणि दानिश सत्तार शेख (वय १९, रा. श्रीरामपूर, हल्ली संगमनेर) अशी सांगितली.
आरोपींची झडती घेतली असता त्यांच्याकडे स्क्रू ड्रायव्हर, मिरची पूड, ५ मीटर लांब दोरी, लोखंडी गज आणि मोबाईल फोन आढळून आले. तसेच त्यांच्याकडील स्विफ्ट डिझायर कारची (MH 14 CS 9551) तपासणी केली असता, त्यात ३५ लिटरचा डिझेलने भरलेला ड्रम, दोन रिकामे ड्रम, लोखंडी कत्ती आणि वेगवेगळ्या वाहनांच्या नंबर प्लेट्स मिळून आल्या. यावरून ही टोळी मोठा गुन्हा करण्याच्या उद्देशाने जमल्याचे निष्पन्न झाले.
पकडलेल्या आरोपींना पोलीस कोठडीत घेऊन सखोल चौकशी केली असता, त्यांनी घारगाव पोलीस ठाण्याच्या हद्दीत उभ्या ट्रकमधून डिझेल चोरी केल्याचे दोन गुन्हे केल्याची कबुली दिली आहे. ही कारवाई पोलीस अधीक्षक सोमनाथ घार्गे, अपर पोलीस अधीक्षक सोमनाथ वाघचौरे, उपविभागीय पोलीस अधिकारी कुणाल सोनवणे यांच्या मार्गदर्शनाखाली सहायक पोलीस निरीक्षक हेमंत थोरात, दत्तू चौधरी, प्रमोद गाडेकर, सुभाष बोडखे, चांगदेव नेहे आणि दत्तात्रय आंधळे यांच्या पथकाने केली. या प्रकरणाचा अधिक तपास घारगाव पोलीस करत आहेत.
