महाराष्ट्र संवाद न्यूज ऑनलाईन, संगमनेर:
संगमनेर तालुक्यातील वडगावपान परिसरात दैवी शक्तीचा दावा करून लोकांची आर्थिक आणि शारीरिक फसवणूक करणाऱ्या भोंदू महाराजासह त्याच्या इतर साथीदारांवर संगमनेर तालुका पोलीस ठाण्यात गुन्हा दाखल करण्यात आला आहे. ‘दत्तधाम सरकार’ नावाचे यूट्यूब चॅनल चालवून कॅन्सरसारखे गंभीर आजार मंत्राने बरे करण्याचा आणि अपत्यप्राप्तीचा दावा करून या टोळीने अनेक लोकांची फसवणूक केल्याचे समोर आले आहे.
या प्रकरणी ॲड. रंजना पंढरीनाथ पगार यांनी फिर्याद दिली असून, पोलिसांनी भोंदू महाराज राजेंद्र बापू गडगे, डॉ. मोहन पुरी, ज्ञानेश्वरी गडगे, सुरज शिंदे आणि मधुकर शिंदे अशा एकूण पाच जणांविरुद्ध गुन्ह्याची नोंद केली आहे. पुन्हा दाखल होताच संगमनेर तालुका पोलिसांनी मध्यरात्रीच भोंदू महाराज राजेंद्र गडगे याच्या सह त्याच्या साथीला मधुकर शिंदे याला अटक केली आहे. तर अन्य आरोपींचा पोलीस शोध घेत आहे.
आरोपींनी गेल्या दहा वर्षांपासून परिसरात दहशतीचे वातावरण निर्माण करून लोकांना मंत्रशक्तीने समस्या दूर करण्याचे आमिष दाखवले होते. आजार बरे करण्याच्या नावाखाली आरोपी लोकांकडून ११ हजार ते ५१ हजार रुपयांपर्यंत मोठी रक्कम उकळत असल्याचे तपासात उघड झाले आहे.
केवळ आर्थिक लूटच नाही, तर आरोपींनी पालापाचोळ्याचे औषध देऊन अनेक रुग्णांच्या जिवाशी खेळ केल्याचेही तक्रारीत म्हटले आहे. या बनावट औषधांमुळे अनेक लोकांना गंभीर शारीरिक त्रास सहन करावा लागला असून, लोकांचे मानसिक आणि शारीरिक शोषण करण्यात आले आहे. या गंभीर प्रकाराची दखल घेत पोलिसांनी भारतीय न्याय संहिता, महाराष्ट्र नरबळी आणि इतर अमानुष अनिष्ट व अघोरी प्रथा व जादूटोणा प्रतिबंधक कायदा, तसेच ड्रग्स अँड मॅजिक रेमिडीज ॲक्टच्या विविध कलमान्वये गुन्हा दाखल केला आहे.
संगमनेर तालुका पोलीस ठाण्याचे पोलीस निरीक्षक प्रवीण साळुंखे या प्रकरणाचा पुढील तपास करत असून, या रॅकेटमध्ये अजून कोणाचे हात गुंतले आहेत का याचा शोध पोलीस घेत आहेत.
