महाराष्ट्र संवाद न्यूज ऑनलाईन, संगमनेर:
लोकसभेत मांडण्यात आलेल्या नारीशक्ती वंदन अधिनियमाला विरोध करणाऱ्या काँग्रेस आणि इंडी आघाडीच्या धोरणांविरोधात संगमनेर शहर महिला शिवसेना महायुतीच्या वतीने आक्रमक पवित्रा घेण्यात आला.
बसस्थानक परिसरात एकत्र येत शिवसेनेच्या महिला पदाधिकाऱ्यांनी काँग्रेस नेते राहुल गांधी यांच्या निषेधार्थ जोरदार घोषणाबाजी केली. यावेळी महिलांनी हातात बांगड्या घेऊन आणि निषेधाचे फलक झळकावून परिसर दणाणून सोडला होता.
नारीशक्ती वंदन अधिनियम हा केवळ कायदा नसून ती ‘मोदींची गॅरंटी’ आहे, ज्याद्वारे महिलांना सन्मान आणि समान संधीची खात्री मिळणार आहे. या विधेयकामुळे ग्रामीण भागातून नवीन आणि कर्तृत्ववान महिला नेतृत्व पुढे येण्यास मदत होणार असताना, काँग्रेसने मात्र महिला शक्तीला नाकारून केवळ घराणेशाहीला महत्त्व दिले आहे, असा आरोप यावेळी करण्यात आला.
सामाजिक कार्यकर्त्या नीलम खताळ, नगरसेविका साक्षी सूर्यवंशी आदींनी या आंदोलनाचे नेतृत्व करत विरोधकांच्या भूमिकेचा तीव्र शब्दात निषेध केला. या आंदोलनात महिला सहभागी झाल्या होत्या. नारीशक्तीचा अपमान सहन केला जाणार नाही, अशा घोषणा यावेळी देण्यात आल्या तसेच महिलांच्या प्रगतीला अडथळा आणणाऱ्या शक्तींना धडा शिकवण्याचा निर्धार यावेळी व्यक्त करण्यात आला.
नारीशक्ती वंदन विधेयक हे खऱ्या अर्थाने महिलांच्या राजकीय आणि सामाजिक सक्षमीकरणाचा पाया आहे. मात्र, केवळ राजकीय द्वेषापोटी राहुल गांधी आणि त्यांच्या मित्रपक्षांनी या ऐतिहासिक विधेयकाला विरोध करून महिलांच्या प्रगतीला खिळ घालण्याचे काम केले आहे. महिलांना त्यांचे हक्क मिळवून देण्याऐवजी त्यांना दुय्यम स्थान देण्याची काँग्रेसची ही वृत्ती आम्ही कदापि सहन करणार नाही. जोपर्यंत महिलांना न्याय मिळत नाही, तोपर्यंत आमचा हा लढा सुरूच राहील. – साक्षी सूर्यवंशी, नगरसेविका.
